ЯҢАЛЫКЛАР

Көз — елның гаҗәеп вакыты: һава үтә күренмәле һәм бераз салкынча була, сукмаклар яфраклардан ясалган чуар келәм белән каплана, ә кояш баюлары җылы гәрәбә яктысы белән тула. Нәкъ менә шул чорда аеруча акрынаеп, яфракларның акрын гына кыштырдавын тыңлыйсы һәм табигатьнең үзенә бертөрле, бераз уйчан матурлыгын тоясы килә.

13 сентябрь көнне Олы Нырты авыл мәдәният йорты һәм китапханә хезмәткәрләре балалар өчен «Көзге яфрак кою» экологик сәгате үткәрделәр. Чара барышында балалар табигатьнең гаҗәеп дөньясына мавыктыргыч сәяхәт ясадылар, экологиянең нәрсә икәнен, табигатьне һәм аның ресурсларын ничек сакларга кирәклеген белделәр, Табигатьтә көз көне генә бара торган үзгәрешләр турында бик күп кызыклы фактлар белделәр. Балалар табышмакларны чиштеләр, ребуслар һәм кроссвордлар чиштеләр, экологик викторина сорауларына җавап бирделәр, көзге табигать турындагы мәкальләрне һәм әйтемнәрне искә төшерделәр. Чара азагында балалар көз турында шигырьләр тыңладылар.

11 сентябрь көнне Лесхоз бистәсендә урнашкан “Карпат” ял итү базасында мәдәният бүлеге хезмәткәрләре — китапханәләр, музейлар, мәдәният йортлары, сәнгать мәктәпләре өчен профсоюз оешмасының  мәдәни җыены узды. Бәйрәм төрле мәдәният оешмаларыннан килгән хезмәттәшләрне берләштерде, алар өчен ял итү, формаль булмаган шартларда аралашу һәм үз сәләтләрен күрсәтү мөмкинлеге өчен мәйдан булды.

Җыен тантаналы өлеш белән ачылды. Сүзне Саба муниципаль районы башлыгы урынбасары Расих Рәхимҗан улы Закирҗанов, мәдәният хезмәткәрләре һөнәр берлегенең Татарстан җөмһүрият комитеты җитәкчесе Альбина Фәрит кызы  Сабитова, мәдәният бүлеге җитәкчесе Рөстәм Фидәил улы Заһидуллиннар алды. Алар үз чыгышларында коллективның бердәмлеге мөһимлеген билгеләп үттеләр, мәдәният хезмәткәрләренә көндәлек эшләре, тармакның үсешенә керткән өлешләре өчен рәхмәт белдерделәр.  Хезмәткәрләрнең хокукларын саклауда, аларның кызыксынуларын яклауда профсоюз оешмасының төп таяныч булуын искәрттеләр.

Тантаналы өлештә актив профсоюз әгъзалары, алдынгы мәдәният учаклары, аларның хезмәткәрләре бүләкләнде. Озак еллар дәвамында намуслы эшләгән, җәмәгать эшләрендә катнашкан, әһәмиятле проектларны тормышка ашырган хезмәткәрләргә мактау грамоталары тапшырылды.

Аерым кызыксыну уятканы — мәдәният хезмәткәрләре үзләре үткәргән мастер‑класслар булды. Бирнә җыю, төрле конкурс-ярышлар үткәрүдә тәҗрибәле белгечләр үз серләрен ачтылар, осталыклары белән бүлештеләр. Мастер‑класслар тәҗрибә алмашу мәйданы гына түгел, ә һәрберсенең үз һөнәренә башка күзлектән карау, үзләрен сынау өчен дә мөмкинлек булды.

Рәсми кисәктән соң кунакларны бик күңелле күңел ачу программасы көтте. Аерым оештырылган мәйданчыкларда спорт уеннары һәм күңелле ярышлар узды. Төрле оешмалардан килгән хезмәткәрләр үз тизлекләрен, оешкан төстә бергә эшли белүләрен күрсәттеләр.

Бәйрәмнең иң югары ноктасы — концерт программасы. Сәхнәдә мәдәният өлкәсенең инде танылган йолдызлары белән бер рәттән, әле күпләребез өчен яңалык булган хезмәттәшләребез иҗаты да урын алып, җыр, шигырь, бию номерлары һәм театр миниатюралары яңгырады.

Чараны оештыручылар бәйрәмнең төп максаты — мәдәният хезмәткәрләренең казанышларын билгеләп үтү генә түгел, ә коллектив рухын ныгыту, формаль булмаган шартларда аралашу өчен җирлек тудыру һәм һәрберсенең иҗади потенциалын ачу булуын ассызыкладылар. Катнашучыларның фикеренчә, бу максат үтәлде: мәдәни җыен аларда күңелле, җылы хис-кичерешләр калдырды. Күп кенә хезмәткәрләр мондый очрашуларның зур мәдәни команданың бер өлеше булуны тоярга ярдәм иткәнен, үзара дуслыкны ныгыту өчен шундый очрашулар кирәклеге турында әйттеләр.

Саба туган якны өйрәнү музеенда ДАО "Волга" яшьләр үзәге коллективы өчен экскурсия узды. Алар төбәкнең бай тарихы турында күп кенә мәгълүмат тупладылар, җирле халыкның тормышы һәм гореф-гадәтләре турында сөйләүче экспонатлар белән таныштылар. Экскурсия кунакларга районның үткәнен белергә һәм буыннар бәйләнешен күрергә ярдәм итте. Яңа тәэсирләр һәм белемнәр яшьләр проектлары һәм агарту эше өчен идеяләр тупланмасын тулыландырачак.

Олы Нырты авылы мәдәният йорты һәм китапханә хезмәткәрләре "Беслан - бөтен планетаның сызлануы һәм кайгысы" дигән тематик әңгәмә үткәрделәр. Чара барышында катнашучылар соңгы унъеллыкның иң танылган терактлары һәм 2004 елның сентябрендә Беслан шәһәрендә булган фаҗига турында белделәр. Яшьүсмерләр "Хәтер. Беслан" видео-фильмын карадылар. Әлеге коточкыч фаҗигадә һәлак булучыларны чарада катнашучылар бер минут тынлык белән искә алдылар. Катнашучылар «Россия терроризмга каршы» мәгълүмати буклетлары белән таныштылар.

Бөек татар шагыйре Габдулла Тукайның 140 еллыгына Татарстанда «Тукайны бергәләп укыйбыз» проекты дәвам итә. Проект милли әдәби мирасны саклап калуга, популярлаштыруга һәм үстерүгә ярдәм итә. 3 Шәмәрдән авыл китапханәсе балалар өчен «Тукайны бергәләп укыйбыз» әдәби сәгатен үткәрде. Бу пәнҗешәмбе балаларга бөек татар шагыйренең «Өмид» дигән шигыре укылды.

Олы Нырты авыл мәдәният йорты һәм китапханә хезмәткәрләре чираттагы «Бакыр сукмагы» туристик маршрутын үткәрделәр. Бүген туристлык маршрут буенча Туктар һәм Сабабаш авыл клубларының мәдәният хезмәткәрләре оештырган төркем узды.

Маршрут Советлар Союзы Герое И.С.Башкиров бюсты белән һәйкәл янында башланды. Кунаклар геройның батырлыгы турындагы хикәяне тыңладылар. 

Аннары туристлар Завод Нырты авылы һәм Мишә бакыр эретү заводы, Петр һәм Павел чиркәве барлыкка килү тарихы белән таныштылар, «Тормыш күле» һәм Наратлык турында мәгълүмат тыңладылар. 

Кунаклар Олы Нырты һәм Чабья Чурчи авылларының тарихы белән таныштылар, академик Ә.Г.Кәримуллин туган йорты янында булдылар. 

Туристлык маршрутын күпфункцияле авыл мәдәният йортының яңа бинасында төгәлләделәр. Мәдәният йортында кунакларны «Арт-Грате» марионеткалар театры каршы алды, мәдәният йорты базасында оештырылган Туган як тарихы музеенда булдылар. Турның һәр катнашучысы истәлеккә бакыр рудасы шлагы кисәге алды.

Олы Нырты авыл мәдәният йорты һәм китапханә хезмәткәрләре «Көзнең ачык төсләре» дигән рәсем конкурсы үткәрделәр. Конкурс башланганчы көз турында әңгәмә үткәрелде. Балалар көзнең өстенлек итүче төсләрен билгеләделәр, аның билгеләрен санап үттеләр: яфраклар коелу, уңыш җыю, яңгырлар, салкыннар. Ләкин коелучы яфракларның төсләр палитрасына аерым игътибар бирделәр. Балалар шулай ук табышмакларны чиштеләр һәм көз турында рус һәм татар телләрендә шигырьләр тыңладылар. Аннары иҗатка керештек. Конкурста катнашучыларның барысы да бик тырыштылар. Балалар үз эшләрендә көзге кәефне сурәтләделәр. Балалар үзләренең иҗади сәләтләрен, индивидуальлекләрен күрсәттеләр.

Саба туган якны өйрәнү музеенда “Мирас” клубына йөрүчеләрнең чираттагы утырышы үткәрелде. Әлеге очрашуның төп темасы туган төбәгездә туып үскән күренекле шәхесләр турында өйрәнүне, эзләнүне дәвам итеп Саба сәүдәгәре Сәгыйть Хәялин турында булды.

1745 нче елда Саба сәүдәгәре Сәгыйть Хәялин, Саба ягы һәм Казан губернасының башка авылларыннан 173 гаиләне Оренбург ягына күчереп, Каргалы бистәсенә нигез сала. Әлеге алым Россия хөкүмәтенә Урта Азия илләре белән сәүдә һәм дипломатик мөнәсәбәтләрне җайга салу өчен кирәк була. Төбәк тарихын өйрәнүче Сафин Ильдар Фатхулла улы Каргалы авылының тарихи истәлекле урыннарына сәяхәте турында чыгыш ясады. Хәялиннәр нәселенең дәвамчылары белән очрашуы, әлеге төбәкнең яшәеше, элеккеге биналар тарихы турында күп кенә мәгълүмат җиткерелде. Утырышка килүчеләрнең күп кенә сорауларына җавап бирелде, фикер алышынды. Соңыннан якташыбыз истәлегенә музейда экспозиция ачылды. Саба төбәгендә тырыш, максатчан шәхесләр яшәве һәммәбездә горурлык хисе тудырды.

Ел саен, 3 сентябрьдә, Россия террорчылыкка каршы көрәштә теләктәшлек көнен билгеләп үтә. Бу 2004 елның сентябрендә Бесланда бөтен илне һәм бөтен дөньяны тетрәндергән фаҗигале вакыйгалар истәлегенә билгеләнгән матәм датасы. Ул хәзерге кешелекнең иң бөек бәла — казаларының берсе-халыкара террорчылыкка каршы көрәшнең мөһимлеген ассызыклый. Россия өчен бу көн гомуммилли кайгы көне булды, ә дата Россия Федерациясе Президенты Указы белән террорчылыкка каршы көрәштә теләктәшлек көне дип игълан ителде.

Бүген, 2026 елның 3 сентябрендә сәнгать бүлеге укытучысы Газизова Гүзәл Равилевна укучылар өчен “Без террорга каршы!”  дип исемләнгән лекция-әңгәмә үткәрде.

03.09.2026 конне Байлар Сабасы шәһәр тибындагы бистәсенең "Ямьле Саба" яр буенда "Саба балалар сәнгать мәктәбе хореография бүлегенең 3-4 кл укучылары белән террорчылыкка каршы көрәштә теләктәшлек көненә багышланган чара үткәрелде. Әлеге чара балалар өчен аңлаешлы формада иң мөһиме – тынычлык, иминлек һәм кешелеклелек турында сөйләшү өчен оештырылды.