ЯҢАЛЫКЛАР

21 март көнне Оет авылы клубы авыл китапханәсе белән берлектә «Нәүрүз»бәйрәменә бүләкләр җыю оештырды. Бу күптәнге традиция. Ул үсеп килүче буынны татар халкының гореф-гадәтләренә һәм йолаларына җәлеп итәргә ярдәм итә. Балалар ишегалларына кереп теләкләр әйттеләр һәм җырларда хуҗаларга булган мөнәсәбәтләрен белдерделәр.

Бүген  Олы Шыңар авылында яшәүче Җамалетдинова Нурлыхөдә Җамалетдин кызының туган көне. Ул 1927 елның 18 мартында Саба районы Олы Шыңар авылында туа.     Нурлыхода апа 8 яшьтән укырга кергән. Март аена кадәр укыганнан соң алар гаиләләре белән Кемеровога күчеп китәләр. 1936 – 1939 елларда шунда яшиләр.

    Нурлыхода апага 12 яшь вакытта, 1939 елны алар кабат  Олы Шыңарга әйләнеп кайталар. Озакламый авыр сугыш еллары башланып китә.  1941нче  елда Кыяметдин абыен сугышка алалар.

   Ул вакытта хатын – кызлар бер караңгыдан икенче караңгыга кадәр урак урганнар. Урган җирләрне метрлап үлчиләр. Менә шушы уракчы хатын – кызлар артыннан  калган башакларны җыеп барганнар алар, шуның өчен көне буена бер сынык ипи биргәннәр. Көлтәне ташып эскерткә өйгәннәр, суктыргычка атып башак суктырганнар.

   1947 елда Олы Шыңар авыл медпунктында санитарка булып эшли башлый, 1989 елга кадәр яраткан хезмәтен ташламый, шунда эшләп пенсиягә чыга.

    “Бөек Ватан сугышы” елларында тылдагы  хезмәтләрен бәяләп  “Фидакарь хезмәт өчен” медале,  Бөек Җиңүнең  юбилей медальләре бирелә, 1982 елда “Хезмәт ветераны” медале белән бүләкләнә.

   Бүгенге көндә  Олы Шыңар авылында ялгызы гына гомер кичерә.

   Хөрмәтле Нурлыхода апа! Сезне туган көнегез белән тәбрик итәбез. Сезгә сәламәтлекнең ныгын, гомернең бәрәкәтлесен, күңел тынычлыгы телибез. Ходай биргән гомерегезне тынычлыкта, сәламәтлек белән яшәп үткәрегез.

Россия гадәттән тыш хәлләр министрлыгының Татарстан Республикасы буенча УНД һәм ПР Баш идарәсенең Саба һәм Теләче муниципаль районнары буенча күзәтчелек эшчәнлеге һәм профилактик эш районара бүлеге башлыгы, эчке хезмәт подполковнигы Галимуллин Айнур Рифкат улы Олы Шыңар урта мәктәбе укучылары белән профилактик әңгәмә үткәрде.

   Очрашу барышында ул укучыларга гражданнар оборонасы кагыйдәләре, халыкның гадәттән тыш хәлләрдәге гамәлләре турында сөйләде, шулай ук янгын куркынычсызлыгының төп таләпләрен искә төшерде. Янгын чыкканда үз-үзеңне тоту кагыйдәләренә, эвакуация вакытында дөрес гамәлләргә һәм көнкүрештә һәм мәктәптә куркынычсызлык чараларын үтәү зарурлыгына аерым игътибар бирелде.

8 Март-иң дулкынландыргыч, иң назлы һәм гаҗәеп бәйрәм, ул яз килүен символлаштыра. Ул иң сөйкемле һәм иң назлы, иң яраткан һәм иң якын әниләргә һәм әбиләргә багышлана. Оет авыл клубы авыл китапханәсе белән берлектә Халыкара хатын-кызлар көненә багышланган «Күңел җылысын сезгә бүләк итәбез, кадерлеләребез" дигән бәйрәм программасы үткәрде. Чара барышында катнашучылар төрле конкурсларда үзләренең осталыкларын күрсәттеләр.

Олы Шыңар  "Әллүки" балалар бакчасында 8 Март Халыкара хатын-кызлар көненә багышланган бәйрәм чарасы узды. Балалар әниләргә, әбиләргә һәм тәрбиячеләргә багышланган җыр-биюләр башкарып, бәйрәм чыгышлары әзерләгәннәр.  Чара җылы һәм күңелле узды, бик күп уңай хис-кичерешләр һәм истәлекләр калдырды.

   "Тимершык – Шыңар" командасы 2026 елгы сезонда авыл җирлекләренең ир-атлар ветеран командалары арасында мини-футбол буенча Саба муниципаль районы чемпионатында (40+)  2 урынны яулады.

   Команданы җиңүләре белән котлыйбыз. Барлык катнашучыларга да зур рәхмәтебезне белдерәбез һәм уңышлар телибез!

Бүген Олы Шыңар авылында гомер итүче тыл ветераны Набиуллина  Рәйсә  Гыйлметдин кызы үзенең туган көнен бәйрәм итә.

    Рәйсә апа сугыш башланганда  1нче сыйныфны гына тәмамлаган була. Сугыш башлануга әтиләре сугышка китә. Сугыш еллары бик авыр булса да кечкенә кыз сынатмый, авырсынмый, сабыр итә, чөнки абыйларын бик ярата. Эштән дә куркып тормый, урагын да ура, плугарь булып та йөри. 

   Сугыш беткәннән соң да тормыш җиңел булмый, бер көн дә колхоз эшеннән калмый.  Уракка, тырмага йөри, фермада да эшли. 2 ел рәттән 3әр ай торф чыгарырга бара. Аннары 1 ел Чиләбедә, йорт салуда эшли, кирпеч белән раствор ташып торалар.

    1958 елның 12 мартында Олы Шыңарга килен булып төшә ул.

Рәйсә апа белән Нәҗип абый өч малай, ике кыз тәрбияләп үстерәләр. Нәҗип абый 2016 елда  вафат була. Рәйсә апаның бүгенге көндә 11 онык, 12 оныкчыгы бар. 1968 елда “Ана медале” белән бүләкләнә ул. Медальләре арасында Бөек Җиңүнең түгәрәк даталарына бирелгәннәре дә, тырыш хезмәтләре өчен бирелгәннәре дә шактый.  Бугенге көндә Олы Шыңар авылында улы Илфат, килене Диләрә  тэрбиясендэ  яши.

   Рәйсә апа! Сезне ихлас күңелебездән туган көнегез белән котлыйбыз. Сәламәтлекнең ныгын, гомернең бәрәкәтлесен, күңел тынычлыгы телибез. Ходай биргән гомерегезне тынычлыкта, сәламәтлек белән яшәп үткәрегез. Һәрбер туган таңга сөенеп яшәргә язсын.
 

Ватанны саклаучылар елына багышланган чаралар кысаларында Кече Шыңар мәдәният йортында китапханәче белән бергә махсус хәрби операциядә катнашучы Рабгутдинов Рәмис белән очрашу узды. Рәмис туган җирләренә сугыш хәрәкәтләре зонасыннан кыска вакытлы ялга кайткан. Егетләр белән очрашуда ул солдат хезмәте, үзенең хәрби бурычлары турында сөйләде, хәзерге заман хәрбие физик яктан әзер булырга гына түгел, ә тирән белемгә ия булырга, катлаулы ситуацияләрдә карарларны тиз кабул итә белергә, үз-үзен даими үстерүгә һәм укытуга әзер булырга тиеш дип ассызыклады. Рәмис шулай ук махсус операциядә катнашучы солдатлар өчен туганнарының һәм бөтен җәмгыятьнең мораль ярдәме бик мөһим булуын билгеләп үтте, балаларга ихлас хатлары һәм открыткалары өчен рәхмәт белдерде. Очрашу кысаларында укучылар сугыш көннәре, солдатларыбызның кораллануы, алгы сызыкта яшәүнең көнкүреш шартлары, очрашырга туры килгән кыенлыклар турында сораулар бирделәр. Әңгәмә ахырында хезмәткәрләр һәм балалар сугышчыга нык сәламәтлек, имин хезмәт һәм тизрәк өйгә кайтуын теләделәр.

21 февраль көнне Олы Шыңар урта мәктәбендә Ватанны саклаучылар көненә багышланган «Строй һәм җыр смотры» дигән традицион конкурс булып узды. Чарада төрле сыйныф укучылары командалары катнашты, алар сафка әзерлекләрен, патриотик җырлар башкару һәм маршлый белүләрен күрсәттеләр. Конкурс тантаналы атмосферада узды, үсеп килүче буын арасында Ватанны саклаучыларга патриотизм һәм хөрмәт тәрбияләүнең мөһимлеген ассызыклады.

Олы Шыңар авыл җирлегенең административ бинасында түбәне кардан чистарту оештырылды. Бу түбәгә зыян килү ихтималын вакытында булдырмаска мөмкинлек бирде. Даими рәвештә кардан чистартып тору инфраструктураны саклауның мөһим өлеше булып тора һәм уңайлылык һәм куркынычсызлык дәрәҗәсен күтәрүгә ярдәм итә.