ЯҢАЛЫКЛАР

28 нче январь көнне Мичән авыл җирлеге гражданнары җыены булып узды. Җыен Иске Мичән авылы мәдәният йортында үткәрелде. Мәдәният йортына килә алмаган кешеләр җыенда «ZOOM» программасы аша, дистанцион рәвештә катнаша алдылар. Җыенда Саба муниципаль районы башлыгы урынбасары Закирҗанов Расих Рәхимҗан улы, хокук саклау органнары вәкилләре, оешма-предприятия җитәкчеләре һәм вәкилләре катнашты. 

ООО “Саба”ның Мичән филиалында чәчкечләрне язгы кыр эшләренә әзерләү оешкан төстә башкарыла.  Бүгенге көндә слесарьлар Хадиев Ильфар, Галимуллин Айдар чәчкечләрне төзекләндерү эшләрен башкаралар.

Мичән авыл җирлеге биләмәсендә, ПМК “Мелиорация” оешмасы тарафыннан,укытучы гаиләсенә арендалау өчен торак йорт төзү эше тәмамланды. Йорт тирәли капка коймалар корылды. Бүгенге көндә   яшь гаилә кереп яшәрлек итеп барлык уңайлыклар тудырылган. Җиһазлар урнаштырылган. Йортның ачкычы укытучы гаиләсенә тапшырылды

8 январь көнне Яңа Мичән мәдәният йортында балалар өчен фольклор сәгате булып узды. Чара барышында балалар татарларның көнкүреше тарихы белән таныштылар. Катнашучылар әбиләрнең сандыгына күз салдылар. Анда элекеге буын әбиләребезнең кием-салымнары, бизәнү әйберләре, сөлгеләре һәм көнкүреш әйберләре саклана. Һәрбер әйбер кеше кулының кагылу җылысын, останың энергетикасын, ниндидер сер саклый. Балалар игътибар белән милли бизәкләр, хатын-кыз милли киемнәре элементлары, боларның ничек барлыкка килүе турында мавыктыргыч хикәя тыңладылар. Катнашучылар кулъяулык, камзул, калфак, сөлгеләр бизәкләренә сокланып карап тордылар. Фольклор сәгате татар халкының үткәненә күз салырга һәм хәзергесе белән бәйләүче җепләр табарга ярдәм итте.
 

Мәдәният йорты хезмәткәрләре  Иске Мичән авылында"Татарстанда- кыш" проекты кысаларында. "Тау шуу" бәйрәме үткәрде. 

2 гыйнвар көнне  авылыбызнынң хөрмэтле кешесе тыл Һәм хезмәт ветераны Латыйпова  Әлфия апага 90 яшь тулды. Әлфия апа Рафис абый белән 6 бала тәрбияләп үстерделәр. Бүгенге көндә Әлфия апага балалары,оныклары, оныкчыклары монаерга, уйланырга юл куймыйлар, туган нигезгә шатланып кайтып йориләр. Әлфия апа бүгенге көндә дә җор телле, кешеләрне ихлас яратканы сизелеп тора.   

Юбилиярны котлау өчен Саба районы  социаль яклау мөдире Гайнетдинова Лилия Нургаян кызы, Мичән авыл җирлеге башлыгы Гараев Айзат Әхмәтгали улы килде.

Юбилей көнендә Әлфия апага сәләмәтлек, җан тынычлыгы, бәхетле картлык телибез, балаларыгызның, якыннарыгызның кайгыртуын тоеп яшәргә ходай насыйп итсә иде.
 

Оттырышсыз Яңа Ел лотереясе — авыл халкын һәм кунакларны Мәдәният йортына җәлеп итеп, аларны сөендерүнең менә дигән ысулы. 31 декабрь көнне Иске Мичән мәдәният йортында традицион лотерея билетлары уйнатылды. Уен концерт номерлары белән үрелеп барды. Мондый күңел ачу балаларга да, өлкәннәргә дә ошый! Барысы да актив катнаштылар, күңел ачтылар һәм ул һәрвакыттагыча яхшы үтте! Уенда катнашучылар  барысы да канәгать калды, чөнки җиңелүчеләр юк, һәркем үз отышын алды. Соңыннан 90 нчы еллар дискотекасы булды.

Мичән авыл җирлегенә кергән Иске Мичән, Яңа Мичән, Керәнне  мәдәният хезмәткәрләре «Яңа ел чыршысында кунакта” дигән бал-маскарад бәйрәмнәре үткәрделәр. Бәйрәмне Мичән авыл җирлеге башлыгы Гараев А.А. ачып җибәрде. Авылдашларны, кайткан кунакларны Яңа ел белән котлады, музыкаль бүләк тә әзерләгән иде. Чара төрле персонажлар, алып баручылар катнашында музыкаль — театральләштерелгән тамаша белән дәвам итте, алар барлык катнашучыларны мавыктыргыч конкурсларда катнашырга чакырды. 

Яңа ел-иң якты һәм истә калырлык бәйрәм, ул үзе белән тылсым һәм могҗизалар алып килә, чын бәхет һәм күңел ачу хисе бирә. Барыннан да бигрәк бу бәйрәмне балалар көтәләр һәм аңа шатланалар! Мичән төп мәктәбендә дә укучылар өчен Яңа ел бәйрәмнәре 2 сменада үтте. Башлангыч сыйныф укучылары Кыш бабай, Кар кызына үзләренең  җыр-бию, шигырь сөйләү буенча һәнәрләрен күрсәттеләр. Югары сыйныф укучылары арасында КВН  үтте. Укучылар тырышып әзерләнгәннәр, күңелле чыгышлары белән һәркемнең соклануын тойдылар. Яңа ел бәйрәмнәре күңелле үтте.
 

Яңа ел каникуллары якынлашу белән Мичән авыл җирлегендә бәйрәм рухы тудыруга, авыл халкы һәм кунаклар өчен уңайлы ял һәм иминлек тәэмин итүгә юнәлдерелгән әзерлек эшләре активлашты. Һәр тармак үз биләмәсен Яңа ел рухы белән бизәү эшләрен башкарды.