ЯҢАЛЫКЛАР

27 август көнне Арчада Бөтендөнья әдәби марафоны җиңүчеләре Әдәби Сабантуйга җыелды. Саба районыннан мәдәният бүлеге җитәкчесе Рөстәм Заһидуллин җитәкчелегендәге китап сөючеләр Сабантуй мәйданына дус һәм бердәм булып, җырлап килеп керделәр. Иң күп китап укучыларны туплаган командабыз бу юлы да җиңүче дип танылды һәм махсус кубок белән бүләкләнде.

26 август көнне  район китапханәсенең уку залындаТатарстан Республикасының атказанган ветеринария  табибы, “Чал ветеринар кыйссалары” китабы авторы, “Өлкәннәр” клубының җитәкчесе, “Мишә дулкыннары” язучылар клубының актив әгъзасы Фәрхетдинов Габит Фәсәх улының 75 яшьлек юбилее билгеләп үтелде. “Яшьнәп үткән яшьлек” исемле кичәдә юбилярга карата берсенннән-берсе матур теләкләр яуды. Гөлзилә Нурмөхәммәтова башкаруында моңлы җырның яңгыравы күңелләргә нур, ямь өстәде. Баянда Айнур Габделхаков уйнады.
Саба районының Ветеринария тармагы буенча начальнигы Ганиев Зөлфәт Рифкать улы юбилярны котлап бүләк тапшырды.
 "Саба дулкыннары" ТРКсе директоры Мөбәрәкова Әлфия Галимҗан кызы Габит Фәсәх улына зур юбилее белән котлап, ихлас теләкләрен җиткерде. 
Шулай ук Ветераннар советы җитәкчесе Ильясов Фәнил Ильяс улы да юбилярга матур теләкләрен җиткерде. “Өлкәннәр”, “Мишә дулкыннары” Саба районы язучылары клубының актив әгъзаларына да сүз бирелде. 
“Саба таңнары” газетасы корреспонденты Мәүлетов Фәнил,  юбилярның  ялда булуына карамастан, зур эшләренә соклану хисен белгертте. 
Кичәне алып баручы китапханәчеләр Мостафина Гөлнара, Мөхәммәтшина Илмира да юбилярга карата якты теләкләрен җиткерделәр.
Кичәне йомгаклап үзәкләштерелгән китапханәләр системасы директоры Билалова Ләйсән Рәкыйп кызы коллектив исеменнән Рәхмәт хаты һәм истәлекле бүләк тапшырды.

4 май көнне Саба район балалар китапханәсендә, 1А сыйныф укучыларына ( укытучы Заһидуллина Э.Р.) "Каләм белән җиңдем дошманны" дип исемләнгән әдәби сәгать үткәрелде. Укучыларга якташларыбыз- Советлар Союзы Геройлары турында сөйләнде һәм әдипләребез М.Җәлил, А.Алишның фронтта язган әсәрләре белән таныштырылды. Чара ахырында укучылар Җиңү көненә багышлап открыткалар ясадылар.
Чараны "Саба дулкыннары" район телевидениясе репортаж өчен төшерде.

Китап – кешенең хәтере, юлдашы, киңәшчесе, ярдәмчесе, укытучысы. Китапсыз халык – тарихсыз халыкка әйләнгән, ә тарихын оныткан халыкның киләчәге өзелгән. 2021 елда Саба район китапханәсе “Китап алам кулыма” дип аталган өр-яңа интеллектуаль проект башлап җибәрде. 19 мартта Т.Нәҗмиев исемендәге Шәмәрдән авыл китапханәсендә “Истәлегем булып калыр” дип аталган әдәби-интеллектуаль уен узды. Чара, март аенда туган талантлы язучы, журналист Тәлгат Самат улы Нәҗмиевны, күренекле язучы Фәнис Яруллинны искә алуга багышланган иде. Махсус кунак булып – галим, әдәбият белгече, Татарстан һәм Русиянең атказанган фән эшлеклесе Хатыйп Йосыф улы Миңнегулов кызы Гөлназ белән кайтты. Шулай ук кунакларыбыз арасында якташ язучыбыз, Татарстанның атказанган мәдәният хезмәткәре, Татарстан Журналистлар берлеге әгъзасы Гөлсинә Наил кызы Галимуллина, Тәлгат Нәҗмиевның тормыш иптәше – Лемара ханым, “Саба таңнары” газетасының баш мөхәррире – Рөстәм Габдерәүф улы Исмәгыйлев, мөхәррир урынбасары – Фәнил Мәүлетов  бар иде. Уенчылар 4 командага бүленделәр, һәр командада алтышар кеше үзара зирәклектә көч сынаштылар.1 команда да Тәлгат Нәҗмиевның туган ягы Кукмара районыннан катнашучылар:Ядегәр авылының китапханәчесе Гамилә Габбасова,  Ядегәр авыл мәктәбе укытучысы Люция
Фатыхова,  Ядегәр мәктәбе укучылары
Миннибаева Камилә һәм Хәмзина Әдилә, Манзарас авылы китапханәчесе Фирая
Сабирова. 2 команда да Шәмәрдән үсеш лицее укытучылары, укучылары һәм Шәмәрдән балалар бакчалары тәрбиячеләре. 3 команда да китааханәнең актив китап укучылары, 4 команда да Саба ҮКС китапханәчеләре. Уен барышы 4 китаптан торды. 1 китап – Тәлгат Нәҗмиевның һәм Фәнис Яруллинның тормышына багышланган иде. 2 китапта – Т.Нәҗмиев, Ф.Яруллин иҗатлары буенча сораулар булды. 3 китап – кунагыбыз Хатыйп Миңнегуловка багышланды. Ә инде 4 китапны, якташ шагыйрәбез Илмира Гыймаеваның “Гомер тавы” исемле яңа китабын, Ләйсән Рәкыйповна катнашучыларга үзе тәкъдир итте. Уен ахырында нәтиҗәләр буенча җиңүче команда билгеләнде. Шулай ук үзенең матур җырларының берсен Мичәнбаш авыл китапханәчесе Илнур Ибрагимов башкарды. Һәр катнашучы да истәлекле бүләк иясе булды. Чара бик җылы атмосферада узды һәм чәй табыны артында тәмамланды.

Китапханәчеләребез балалар бакчалары, мәктәпләр белән һәрвакыт тыгыз элемтәдә яши. Балалар өчен чыгучы газета,  журналлар белән дә балаларны иң элек алар таныштыра. "Көмеш кыңгырау" газетасын чыгаручы тылсымлы каләм ияләре, Шәмәрдән балалар китапханәчесе Резедә  Галиәкбәрова чакыруын кабул итеп, бүген Саба районына кунакка килделәр. Шәмәрдән авылының 3нче номерлы "Салават күпере"балалар бакчасында килгән кунакларга, балаларның әти-әниләре белән бергә ясаган китапчыклар күргәзмәсе һәм әкияти тамаша күрсәтелде.Ә "Көмеш кыңгырау"газетасы хезмәткәрләре балаларның тапкырлыкларын сынап уеннар оештырдылар. Шәмәрдән лицеенда кунаклар башлангыч сыйныф укучылары әзерләгән, татар халкының гореф -гадәтләрен чагылдырган  күргәзмә белән таныштылар, Шәмәрдән лицее китапханәсендә "Хәтер"- әдәби кунакханәсендә булдылар.

Яңа ел... Бу сүзләрне ишетүгә безнең күз алдыбызга хуш исле зифа чыршы, ап-ак кар бөртекләре, җемелдәвек сихри утлар килеп баса. Ул һәркайсыбызның иң яраткан бәйрәмнәренең берсе. Мондый серле һәм бай тарихлы бер генә бәйрәм дә юктыр, мөгаен. 

    9 гыйнвар көнне Әбрар Кәримуллин исемендәге район үзәк китапханәсе бәйрәмгә килгән һәркемне җылы каршы алды. Кунаклар өчен төрле уен мәйданчыклары оештырылды, күңелле стартлар, мини-хоккей, төрле конкурслар үткәрелде.

 Кыш бабай белән Кар кызы Яңа елга багышланган  шигырьләр тыңладылар, бәйрәм рухы тудырдылар. 

 Килгән кунакларга Кыш бабай үзенең матур котлауларын җиткерде, шулай ук 2020 ел нәтиҗәләре буенча иң яхшы китап укучыларга дипломнар тапшырды:

1 урын Янгалышева Эльмира Галимҗан кызы

2 урын Йосыпова Фәхимә Фәйзрахман кызы

3 урын Фаттахова Фәридә Нургали кызы

 Барлык катнашучылар бәйрәмнән  күтәренке кәеф алдылар.

5 гыйнвар көнне район китапханәсе хезмәткәрләре, район мәдәният йортының кече залында районыбызның иң тырыш, иң актив укучылары өчен уздырдылган Чыршы бәйрәмендә катнаштылар. Квест - уен "Халыклар бердәмлеге һәм туган телләр елы" уңаеннан оештырылган иде. Танылган якташыбыз, академик, татар китабының тарихын өйрәнгән күренекле шәхес  Әбрар Кәримуллинның шәхси әйберләре, аның күпкырлы  эшчәнлеге, татар халкының язу тарихы белән танышты укучыларыбыз. "Әдәби алан" проектының иң актив укучылары Әнвәр белән Элина  төрле мәкаль, әйтемнәр, сынамышлар аша балаларның тапкырлыгын сынады. Су анасы һәм Куян кызы  биргән кызыклы сорауларга да тиз җавап таба алды килгән кунаклар. Ахырдан Кыш бабай һәм Кар кызы белән истәлек фотога төштеләр.

Район мәдәният бүлеге Әбрар Каримуллин исемендәге Саба район Үзәк китапханәсе белән  берлектә өлкәннәр өчен “Яңа ел мизгелләре” дип исемләнгән чыршы бәйрәме оештыра. Бәйрәм үзәк мәйданда  9 гыйнвар көнне сәгать 13:00 узачак.

Район балалар китапханәсе барлык балаларны һәм әти-әниләрне Яңа ел бәйрәменә чакыра. Бәйрәм 3 гыйнвар көнне 13: 00  үзәк мәйданда узачак. Рәхим итегез!

Бүген, 22 декабрьдә, Бөтендөнья татар конгрессы бинасында «Татар авылы-2020» конкурсында җиңүчеләрне бүләкләү тантанасы узды.
«Татар авылы» конкурсына старт 2020 нче елның 14 нче февралендә бирелде. Россиянең 15 төбәгеннән һәм бер чит илдән 400гә якын кеше катнашты. Авыллар турындагы, булдыклы кешеләр хакындагы язмаларның күбесе Саба районыннан иде.  Районыбыз китапханәчеләре бөтен дөньяга үзебезнең талантлы якташларыбыз турында сөйләделәр, бердәм булып, аларга тавыш бирүне дә оештыра алдылар. 
Бүген исә Конкурс җиңүчеләренә Бөтендөнья татар конгрессы Башкарма комитеты Җитәкчесе Данис Шакиров Дипломнар һәм истәлекле бүләкләр тапшырды.
Конкурсның Гран-при бүләгенә Саба районы лаек дип табылды. Биредәге иң күп тавыш җыйган Кибәче, Арташ, Олы Нырты, Юлбат, Иләбәр, Килдебәк, Явлаштау китапханәләре Диплом белән бүләкләнделәр.