ЯҢАЛЫКЛАР

16 апрельдә Олы Шыңар авыл китапханәсе мөдире Сөләйманова Гүзәл Раиф кызы "Дулкын" радиосында «Китапханәче сүзе» тапшыруында чыгыш ясады. Чыгыш барышында китапханәнең 2023-2024 еллардагы эшенә кыскача күзәтү ясалды. Шыңар авылыннан чыккан якташлар, танылган язучылар, шәхесләр белән таныштырды, аларның тормыш юлы турында сөйләде. Китапханә эшчәнлеге белән танышканнан соң, авылыбызның горурлыгы булган  атказанган механизаторлар, терлекчеләр турында сөйләде. Китапханәгә кергән яңа китаплар тәкъдим ителде. Әңгәмә барышында Гаилә елына һәм фәнни-технологик үсеш елына багышланган темалар да күтәрелде. Күп балалы һәм барлык юнәлешләрдә иң актив булган  Нуриәхмәтовлар гаиләсе чакырылган иде, алар белән гаилә һәм аның кыйммәтләре турында әңгәмә алып барылды. Безнең радио тапшыруындагы очрашу җанлы һәм җылы атмосферада үтте.

12 апрельдә Кече Шыңар мәдәният йортында "Космоска сәяхәт" дигән танып белү программасын үткәрделәр. Башта балалар космонавтика тарихы белән таныштылар: космос турында тикшерү кеше тарафыннан борынгы заманнарда ук башлануы, кешегә кадәр  космоска юл салган хайваннар, беренче очучы-космонавт Ю.А. Гагаринның очышы һәм  ачык космоска беренче булып чыккан очучы – космонавт А. Леонов турында белделәр. Катнашучыларга планеталарны һәм зодиак билгеләрен тану өчен ребуслар һәм табышмаклар тәкъдим ителде, аларның бу теманы  яхшы белүләре ачыкланды. Чара ахырында бергә стена газетасы чыгардылар, китапханә фондыннан  оештырылган тематик китап күргәзмәсе белән таныштылар.

Олы Шыңар авыл китапханәсендә башлангыч сыйныф укучылары өчен Халыкара балалар китабы көне уңаеннан бөек әкиятче Ганс Христиан Андерсенга багышланган кызыклы чара оештырылды. Укучылар китаплар һәм журналлар дөньясына зур кызыксыну күрсәттеләр, актив булдылар һәм күп сораулар бирделәр! Чара барышында шулай ук викторина уздырылды, анда укучылар яраткан әкиятләре турында белемнәрен күрсәтә алдылар. Мондый мавыктыргыч һәм белем бирү чаралары балаларны китап укырга җәлеп итә, баланың рухи дөньясын баетырга һәм киңәйтергә ярдәм итә.

2 апрельдә Кече Шыңар мәдәният йортында «Көлегез, файдасы күп белегез» дигән уен программасы узды. Чара барышында балалар күңелле һәм дуслык атмосферасына чумдылар. Катнашучылардан зирәклек,  игътибар һәм җитезлек таләп ителде. Балалар «Ярты минут шаярту» шаян викторинасында, «Картинаны терелт», «Ситуацияне уйнап күрсәт», "Пантомима" һәм башка конкурсларда катнаштылар. Көлке көне күңелле үтте һәм катнашучыларга яхшы кәеф бирде. Программа ахырында барысы да татлы призлар алды.

 28 мартта Кече Шыңар мәдәният йорты һәм китапханә хезмәткәрләре Көнчыгыш дөньясының күп кенә илләрендә билгеләп үтелә торган иң якты һәм борынгы бәйрәмнәрнең берсе Нәүрүз бәйрәмен үткәрделәр.Катнашучылар үзләре үк  биюләр, җырлар, шигырьләр белән чыгыш ясадылар. Күңелле уеннар, конкурслар, викториналар уздырылды. Барысы бергә милли җырлар җырладылар һәм милли ризыклар белән сыйландылар. Чара кысаларында укучылар төрле илләрдә Нәүрүзнең ничек билгеләп үтелүе, нинди гореф-гадәтләр һәм традицияләр булуы турында күп кызыклы мәгълүмат алдылар. Балалар язгы каникулларның тагын бер көнен күңелле һәм файдалы үткәрделәр.

Олы Шыңар урта мәктәбе коллективы Кече Шыңар авылы мәчетендә ифтар оештырды. Ифтарга укытучылар, пенсионерлар, укучылар, әлеге мәктәп хезмәткәрләре чакырылган иде -  70ләп кеше җыелды. Ифтар алдыннан мәчетнең имам-хатыйбы Рафил хәзрәт тыңлаучыларга ислам диненең асылын аңлатты, кешелек җәмгыятендә аларның намуслылыгын, гаделлеген, игелеген һәм үз – үзләрен тотышын катгый үтәргә чакырды. Шулай ук Сатыш мәчетенең имам-хатыйбы Алмаз хәзрәтнең үтемле  вәгазьләрен тыңладылар.

Олы Шыңар авыл җирлегендә барлык суүткәргеч торбаларны һәм канауларны  чистарту, су басу куркынычы зонасындагы территорияләрне һәм ишегалларын карап чыгу үткәрелде.

23 март көнне Кече Шыңар  һәм Оет авыл мәчетендә ифтар мәҗлесе үткәрелде. Иганәчеләр Кече Шыңар авылында яшәгән Гарипов Мандут һәм Сәвия балалары, Оет авылында чыгымнарны авыл халкы  үзара җыйналып күтәрде.  Мәҗлескә авыл халкы, кайткан кунаклар, балалар җыйналды. 

22 мартта Кече Шыңар мәдәният йортында "Ягез, бер дога" дигән тематик кичә узды, анда "Ак калфак" клубы әгъзалары, Олы Шыңар, Кече Шыңар, Чулпыч авылларының хөрмәтле  хатын - кызлары катнашты. Чараның максаты - халык традицияләрен саклау һәм торгызу, татар халкының рухи һәм традицион кыйммәтләрен пропагандалау. Чарада катнашучылар яшьләргә әхлакый тәрбия бирү, тормыш ситуацияләре турында вәгазьләр тыңладылар. 

17 мартта Кече Шыңар мәдәният йорты һәм китапханә хезмәткәрләре " Карга боткасы” дигән йола- бәйрәме оештырдылар. Алып баручылар бәйрәмдә катнашучыларны сәламләделәр, барысына да тынычлык,  иминлек теләп бәйрәмнең барлыкка килү тарихы белән таныштырдылар. Борынгы заманда кешеләр язны үз канатларында кара каргалар китерә дип уйлаганнар. Шуңа күрә кара каргалар килгәч, халык Карга боткасы пешергән.