Тимершык авыл җирлеге башлыгы бүләкләнде

22 февральдә «Яшьлек» яшьләр үзәге яшьләр эшләре һәм спорт бүлеге белән берлектә Шәмәрдән авылында хезмәт коллективларының һәм авыл җирлекләренең ирләр командалары арасында алкалы хоккей буенча Татарстан Республикасы Саба муниципаль районы Чемпионаты финалы оештырды.  "Тимершык" командасы  чемпион калды. Чын күңелдән котлыйбыз!

22 февраль көнне Лесхоз бистәсендә Саба муниципаль районының авыл хуҗалыгы предприятиеләре һәм авыл җирлекләре арасында чаңгы ярышлары булып узды. Ярышта Тимершык авыл җирлеге исеменнән җирлек башлыгы Хазиев Айдар Ханифулла улы катнашты һәм 2 урынны яулады. Котлыйбыз, алга таба да уңышлар телибез!

Патриотик тәрбия кысаларында «Тургай» приютында тәрбияләнүчеләр «Лесхоз картлар һәм инвалидлар интернат-йортында» булдылар, анда яшәүчеләрне Ватанны саклаучылар көне белән котладылар.  Чара буыннар арасындагы элемтәләрне ныгытуга юнәлдерелгән иде. Тәрбияләнүчеләр бик матур концерт номерлары әзерләгәннәр.  Балалар үз куллары белән ясалган бүләкләр әзерләделәр. Һәр открыткада-балалар җылысының бер кисәкчеге. Күрсәгез иде, бабайлар бу тыйнак бүләкләрне никадәр дулкынланып кабул иттеләр! Алар өчен бу , аларны хәтерләүләре, бәяләүләре һәм хөрмәт итүләре билгесе.  Без картлар һәм инвалидлар интернат-йорты администрациясенә җылы кабул итүләре өчен рәхмәтебезне белдерәбез. Киткәндә, балалар кире кайтырга вәгъдә иттеләр, чөнки мондый очрашулар барыбызны да кешеләргә карата игелеклерәк булырга чакыра.  Иң мөһиме : яклаучы ул— кулына корал тоткан кеше генә түгел, бәлки күңелендә тынычлык һәм яхшылык саклаучы да.