Сабантуй – 2025
Күпмилләтле төбәгебезнең бай мәдәнияте үсеп килүче буынга тәрбия һәм белем бирү өчен зур мөмкинлекләр бирә. Һәр халыкның үз йолалары, бәйрәмнәре, уеннары бар. Безнең төп бурыч үсеп килүче яшь буынны гореф-гадәтләребез, йола-бәйрәмнәребез белән таныштыру. Елдагыча МБМБУ Саба 1нче “Шатлык” балалар бакчасында «Сабантуй» бәйрәме узды. Сабантуй ул - кыр эшләре, чәчү тәмамлануны күңелле бәйрәм итү. Анда милли җыр-биюләр, шаян бәйгеләр, спорт ярышлары тынмый. Бу бәйрәмдә балалар җитезлектә, өлгерлектә көч сынаштылар, спорт уеннарында катнаштылар, ярыштылар. Татар халкының: «Ат чабышы», «Капчык киеп йөгерү», «Көянтә белән су ташу», «Аркан, таяк тартышу», «Кашыкка йомырка салып йөгерү», “Көрәш” кебек милли уеннарда үзләренең осталыкларын күрсәттеләр. Сабантуй бәйрәме уртак татар биюе белән тәмамланды.