«Иминлек. Уттан сак бул»
Янгын куркынычсызлыгы таләпләрен үтәргә күнектерү балачактан сеңдерү мөһим. Нәкъ менә мәктәпкәчә яшьтә балада утка карата куркынычсызлык, аның белән эш итү күнекмәләре һәм янгынны кисәтү яки катлаулы хәлдә дөрес юнәлеш табу өчен кирәкле белемнәр формалаша.
Ут белән сак булу күнекмәләрен тәрбияләү, балаларга шырпының уенчык, утның күңел ачу түгеллеген аңлатырга, балаларда янгынның олылар һәм балалар өчен авыр бәла икәнлеген төшендерү максатыннан, «Иминлек. Уттан сак бул» атналыгы кысаларында МБМБУ Саба 1нче "Шатлык" балалар бакчасында төрле чаралар үткәрелде.
«Өйдә һәм урамда янгын куркынычсызлыгы кагыйдәләре», «Игътибар – электр җиһазлары», «Шырпы – уенчык түгел!», «Янгын сүндерүчеләр хезмәте», «Ут – дусмы әллә дошманмы?» темалары буенча әңгәмәләр үткәрелде. Әңгәмә барышында балалар янгын сүндергеч белән таныштылар, янгын чыгуына сәбәп була ала торган предметлар (шырпы, ут кабызгыч, электр җиһазлары һәм розеткаларның җитешсезлекләре) белән таныштылар, куркыныч предметлар, янгын чыгу сәбәпләре, янгын куркынычсызлыгы кагыйдәләре һәм янгын чыккан очракта үз-үзеңне тоту кагыйдәләре турында белемнәрен ныгыттылар. Ут белән уйнауның нинди зыян китерәчәгенә төшенделәр. Атна дәвамында янгын куркынычсызлыгына багышланган китаплар укыдылар, темага бәйле табышмаклар чиштеләр.
«Ябалак түти белән саклык дәресләре», «Янгын куркынычсызлыгы алфавиты» мультфильмнарын, «Балаларга янгын куркынычсызлыгы» темасына презентация карадылар.
Балалар алган белемнәрен “Янгын сүндерүче машина” рәсемләү, «Янгын сүндерүчеләр ярдәмгә ашыга» кисеп ябыштыру, «Ут – дус, ут – дошман» әвәләү эшчәнлекләрендә чагылдырдылар. «Янгын вакытында нишләргә?», «Нәрсәләр эшләргә ярый? Нәрсәләр эшләргә ярамый?» уеннары аша ныгыттылар.
Ата-аналар белән «Янгын куркынычсызлыгы кагыйдәләре», «Төзәтеп булмый торганны - булдырмагыз!» консультация, әңгәмәләр үткәрелде. «Ата-аналар өчен янгын куркынычсызлыгы кагыйдәләре» күрсәтмә мәгълүмат, «Өйдә янгын чыгу куркынычы турында искәрмә» буклет –әзерләнде.
Тематик атна «Янгын куркынычсызлыгы» темасына викторина үткәрү белән тәмамланды, бу күпчелек балаларда янгын куркынычсызлыгы кагыйдәләрен үтәүгә аңлы һәм җаваплы мөнәсәбәт формалашканын күрсәтте.