Спорт һәм җан рәхәте.
Табибка килүнең якынча 75 - 90% хроник стресс нәтиҗәсендә барлыкка килгән авырулар белән бәйле. Нәкъ менә шуңа күрә дә стресс белән көрәш темасы соңгы елларда шундый актуаль булды. Галимнәр, шулай ук табиб-психиатрлар, психотерапевтлар кешене стресслардан котылуның яңа ысулларын эзлиләр.
Спорт медикаментлар кулланмыйча кешенең психоэмоциональ халәтен яхшыртуның иң нәтиҗәле ысулларының берсе булып тора. Күпьеллык тикшеренүләр күрсәткәнчә, спорт психик сәламәтлек өчен бик файдалы: йөзгәндә, чаңгыда йөргәндә яки скандинав йөреше белән шөгыльләнгәндә, сезнең организм эндорфиннар - «бәхет гормоннары» җитештерә. Алар, башлыча, гипоталамус һәм баш миендәге гипофиз тарафыннан физик активлыкка җавап итеп эшләнә. Эндорфиннар кәефкә йогынты ясыйлар, канәгатьләнү һәм бәхет хисләрен арттыралар, авырту һәм стресс хисен киметәләр. Моннан тыш, спорт белән шөгыльләнү стрессның гормоннарын - кортизол һәм адреналинны яндыруга ярдәм итә.
Тикшеренүләр күрсәткәнчә, физик күнегүләрнең нибары 20 - 30 минуты көн саен кешенең психоэмоциональ халәтен шактый яхшыртырга ярдәм итә ала.
Команда уены вакытында кеше спортның эмоциональ халәткә бик тиз уңай йогынтысын тоя. Бу физик йөкләнеш белән дә, эмоциональ спорт белән дә бәйле. АКШ тикшеренүчеләре физик һәм сексуаль көчләү тәҗрибәсенә ия булган 9 688 баланы өйрәнгән. Тикшеренү нәтиҗәсендә спортның команда төрләрендә даими катнашкан балаларның социаль адаптациясен уңышлы узулары һәм депрессиядән һәм югары борчулардан сирәгрәк интегүләре ачыкланды.
Спорт зарарлы бәйлелек белән көрәшергә ярдәм итә. Спорт белән шөгыльләнү тискәре бәйлелекне читкә кага һәм кеше зарарлы гадәтләргә сарыф иткән вакытны үз файдасына ала. Спорт казанышларын яхшырту өчен дә кешегә зарарлы гадәтләрдән баш тарту җиңелрәк.
Тикшеренүләр күрсәткәнчә, физик күнегүләр депрессия симптомнарын яхшырта һәм рецидив куркынычын киметә. Бер тикшерүдә физик күнегүләр хәтта уртача күләмдә антидепрессантлар белән стандарт дәвалау кебек үк нәтиҗәле булуы ачыкланган.
Шул рәвешле, спорт белән даими шөгыльләнү кешенең психик һәм физик сәламәтлегенә озак вакытлы йогынты ясый.