«Сау бул, җәй!» күңел ачу программасы
Безне җылы кояшлы көннәре белән сөендергән җәй дә ахырына якынлашты. 30 август көнне Кызыл-Мишә мәдәният йорты һәм китапханә хезмәткәрләре балалар белән «Сау бул, җәй!» дигән күңел ачу программасы үткәрделәр. Алар балалар белән бергә «Салкын Чишмә» елгасына экскурсиягә бардылар. Башта балалар җәйне кем белән һәм ничек үткәрүләре турында сөйләделәр. Алар җәй көне уйнап, велосипед һәм роликларда йөреп, елгада су коенып, кызынып кына калмыйча, китаплар укырга да онытмаганнар икән. Уен программасы барышында балалар Җәй белән саубуллашу өчен аңа кунакка бардылар. Юлда алар мәдәният хезмәткәрләре әзерләгән төрле биремнәрне үтәделәр. Катнашучылар җәйге, әкияти викторина сорауларына җавап бирделәр, әкият геройларын таныдылар, җәй һәм әкиятләргә багышланган табышмакларның җавапларын таптылар. Балалар «Себерке белән йөгерү», «Маялы» кебек уеннар уйнадылар, җәй турында шигырьләр укыдылар. Барлык сынауларны узгач, Җәйдә кунакта булып, аның белән саубуллаштылар. Барысы да җәйне һәрвакыт искә алып торачакларын, аны бик сагыначакларын әйттеләр. Якты, күңелле, яшел җәй, киләсе елга кадәр сау бул! Без сине кабат түземсезлек белән көтәрбез! Экскурсия ахырында барлык балалар да алып килгән тәм-томнары белән сыйландылар.