“Секреты татарской кухни”
2020 елның 17 декабре, пәнҗешәмбе
“Чәк-чәк белән каршылау матур гадәт ул бездә! Шушы татлы ризыктан авыз итегез Сез дә!”, - диеп башланып китте “Сәйлән” клуб берләшмәсенең чираттагы бәйрәм чарасы. Шәмәрдән балалар китапханәсе мөдире Галиәкбәрова Р.Х. «Салават күпере» балалар бакчасында тәрбияләнүчеләргә “Татар халкының аш-су серләре” дип исемләнгән мастер-класс оештырды. Әлеге чараның максаты - балаларны татар халкының милли ризыклары белән таныштырып, татар халык ашлары аша тарихыбызга, гореф-гадәтләребезгә, йолаларыбызга карата ихтирам хисе тәрбияләү иде. Бәйрәмебез татар милли ризыклары: чәк-чәк һәм талкыш-кәләвә татып карау белән башланды. “Татар халык ашлары” презентациясе ярдәмендә балалар татар халкының нинди кунакчыл булуын, аш-суының туклыклы, гади, телне йотарлык тәмле, файдалы, төрле булуын белделәр.
“Ак калфак” татар хатын-кызлары республика иҗтимагый оешмасы җитәкчесе Кадрия Рәис кызының “Тәрбия баскычлары” фильмыннан алынган “Ашау әдәпләре” өзеге балаларга сәхнәләштереп күрсәтелде. Аннан соң “Өстәл артында үз-үзеңне тоту кагыйдәләре” уены уйнатылды.
Кунак булып чарага “Аю белән кыз” әкиятеннән Аю килде. Балалар Аю алып килгән төрледән-төрле татар милли ризыкларының исемнәрен, үзенчәлеген өйрәнде.
Резеда Вәлиеваның “Ашлар солтаны” шигыре аша балалар икмәкнең иң кадерле ризык, ашлар солтаны икәнен белде. Шулай ук аларга ипинең ничек барлыкка килүе турында презентация күрсәтелде.
“Ак калач” уеныннан соң балаларга кош теле ясау буенча мастер-класс оештырылды. Балалар зур кызыксыну белән камыр җәйделәр, аннан кистеләр, ә кайберләре пешмәгән килеш татып та карарга өлгерде. Чарага чакырылган әниләр дә балаларга кош теле ясарга булыштылар, үзләренең киңәшләрен бирделәр. Кош телен балалар бакчасы пешекчеләре майда кыздырган арада “Урыныңа барып бас” уены уйнатылды, “Милли татар ашлары” китап күргәзмәсенә күзәтү үткәрелде, “Йомры икмәк” әкияте укылды, кош теле рецепты таратылды.
Кош телләребез әзер булуга аларга шикәр оны сибеп, балалар татып карарга ашыктылар һәм әниләрен сыйладылар. Кош телебез бик тәмле, чарабыз бай эчтәлекле булды һәм күңелле үтте.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Хата таптыгызмы?
Сүзне яки җөмләне билгеләгез һәм CTRL+ENTER басыгыз