Татарстан Республикасы Авыл хуҗалыгы һәм азык-төлек министрлыгы ярдәме белән төзелгән “Бәрәкәт” авыл хуҗалыгы кооперативы Азнакай районында күп крестьян-фермер хуҗалыклары һәм шәхси ярдәмче хуҗалыклар өчен ышанычлы таяныч булды
2017 ел ахырында Азнакай районында сөт җыю, суыту, эшкәртү һәм сату юнәлешендә «Бәрәкәт» авыл хуҗалыгы кулланучылар кооперативы төзелә. Аны оештыру инициаторы - югары белемле белгеч Рәмис Сәхапов. Бу идеяне Рәмис абыйның туганнары - Рөстәм һәм Руслан да хуплап ала. Ә тату эшләүче өч туган - өч баһадир, дип сана инде аларны. Авыл хуҗалыгы кулланучылар кооперативы идарәсе составына бу эшкә битараф булмаган һәм аны белүче тагын бер кеше – Фәрит Муллакаев керә. Ә егетләрне дәүләттән грант ярдәме алу мөмкинлеге рухландырып җибәрә. Шулай итеп, Татарстан Республикасы Авыл хуҗалыгы һәм азык-төлек министрлыгы конкурсларын отып һәм грантлар алып, «Бәрәкәт» кооператорлары үз теләкләренә ирешәләр.
"Бәрәкәт" дәүләт ярдәмен бары тик расланган бизнес-план нигезендә генә куллана. Кооператив 110 пайчыны - 83 шәхси ярдәмче хуҗалыкны һәм 27 крестьян-фермер хуҗалыгын берләштерә. Пайчылар 1000 сум күләмендә еллык пай взносы кертәләр һәм аларга күрсәтелә торган хезмәтләргә пропорциональ рәвештә әгъзалык взносы кертәләр. Җитештерү базасы Азнакайда төзелгән кооперативта 5 эш урыны булдырылган. Агымдагы елның өч кварталында 1416 тонна продукция җитештерелгән, ә план буенча 967 тонна каралган була. Керем шулай ук план күрсәткеченнән артып киткә - 27,4 млн. сум. Авыл хуҗалыгы кулланучылар кооперативы сөт эшкәртү цехы төзегән, чимал кабул итү һәм сыйфат контроле өчен җайланмалар сатып алып урнаштырган. Кооперативта 3 сөт ташу машинасы, ике суыткыч - 5 һәм 10 тоннага, боз генераторы бар. Шулай ук үз лабораториясе, бухгалтериясе дә бар. Хәзерге вакытта авыл хуҗалыгы кулланучылар кооперативы тәүлеккә 15 тоннага кадәр сөт сатып ала.
Сөт сатып алу бәясе, гадәттәгечә, сезонга бәйле үзгәрешләр кичерә. Бары бер нәрсә үзгәрми: авыл хуҗалыгы кулланучылар кооперативы пайчылардан чималны башка авыл хуҗалыгы җитештерүчеләренә караганда 10% ка кыйммәтрәк сатып ала.
- Халык канәгать, кооператив продукция өчен вакытында түли, сөтнең литры өчен соңгы бәя 21 сум иде, – дип сөйләде Сарлы авыл җирлеге секретаре Айгөл Минһаҗева, - ә октябрь аен 22 сумнан ябарга сүз бирделәр.
Сарлы авыл җирлегенә өч торак пункт – тагын Сарлы-Бүләк һәм Сөендек авыллары керә. 421 хуҗалыкта 270 савым сыеры бар - нефть зонасы өчен начар түгел.
Моннан тыш, пайчыларга кооперативта процентсыз кредитлар алу, шулай ук базар бәяләреннән түбәнрәк бәядән терлек азыгы сатып алу мөмкинлеге бар.
«Бәрәкәт» авыл хуҗалыгы кулланучылар кооперативы үз продукциясен күбрәк күпләп сатып алучыларга - Әлмәт, Мөслим, Азнакай һәм Бөгелмә районнарына сата.
- Продукция сатып алуны һәм эшкәртүне тәүлеккә 30 тоннага кадәр арттырырга уйлыйбыз, - дип сөйли авыл хуҗалыгы кулланучылар кооперативы идарәсе рәисе Рәмис Сәхапов. – Шул ук вакытта кооперативка 140-150 пайчы җәлеп итәргә. Моның өчен сәүдә челтәрләренә юл ачарга, шулай ук бюджет учреждениеләренә – мәктәпләрне, балалар бакчаларын сөт продукциясе белән тәэмин итү буенча тендерларда катнашырга һәм җиңәргә кирәк һ.б.лар.