ЯҢАЛЫКЛАР

18 майда Юлбат мәдәният йорты һәм китапханә хезмәткәрләре Юлбат авылы музеен оештыручы һәм саклаучы - җәмәгать эшлеклесе, Татарстан Республикасы туган якны өйрәнүчеләр җәмгыяте советы әгъзасы, атказанган укытучы, тарихчы - Сафин Илдар Фәтхулла улы белән берлектә Халыкара музей көненә багышланган «Хәтер саклаучы-музей» дип исемләнгән экскурсия оештырдылар. Кунаклар күпсанлы экспонатларны, көнкүреш савытларын, документларны, бүләкләрне, татар халкының мәдәнияте, гореф-гадәтләре турында сөйләүче киемнәрне кызыксынып карадылар.

17 майда Юлбат мәдәният йорты һәм китапханә хезмәткәрләре «Яраткан китап битләре буенча» дип исемләнгән мәгълүмат сәгате үткәрделәр. Укучылар яңа китаплар белән таныштылар һәм ошаткан китапларын өйгә укырга алдылар.

15 майда Юлбат мәдәният йорты һәм китапханә хезмәткәрләре Гаилә елы кысаларында һәм Халыкара гаилә көне уңаеннан "Иң күп укучы гаилә" дип исемләнгән китап сәгате үткәрделәр. Яшь укучылар һәм аларның әти-әниләре рәхәтләнеп әңгәмәдә катнаштылар, яраткан язучыларын һәм китапларын искә төшерделәр, яраткан әсәрләре турында сөйләделәр, «Гаиләмнең яраткан әкиятләре» викторинасы сорауларына җавап эзләделәр. Чара шәмнәр ясау буенча мастер-класс белән тәмамланды.

8 май көнне Юлбат авылында Бөек Ватан сугышында Җиңүнең 79 еллыгына багышланган Җиңү көне хөрмәтенә митинг узды. Бөек Ватан сугышы геройларын искә алырга тыл ветераннары, сугыш чоры балалары, Юлбат төп гомуми белем бирү мәктәбе коллективы, җирлек халкы җыелган иде. Митингта авыл җирлеге башлыгы Шәмсиев Талип Рәшит улы һәм 10 нчы Федераль салым хезмәтенең Татарстан Республикасы буенча районара инспекциясе башлыгы Шафиков Айрат Вазыйх улы туган иле өчен гомерләрен биргән солдатларга рәхмәт сүзләрен яңгыраттылар. Сугыш елларында һәлак булган сугышчыларны, сугыштан соң үлгән ветераннарны бер минут тынлык белән искә алдылар, чәчәкләр салдылар һәм җитәкчеләр, ветераннар белән бергә «Хәтер бакчасы» утырттылар.

Бөек Ватан сугышында Җиңүнең 79 еллыгы алдыннан "Георгий тасмасы" патриотик акциясе узды. Бу акциядә авыл җирлеге башлыгы һәм мәдәният йорты хезмәткәрләре катнашты.

«Ветеранга кунакка» Бөтенроссия акциясенә кушылып, 2 майда Юлбат мәдәният йорты һәм китапханә хезмәткәрләре «Сугыш чоры балалары һәм тыл хезмәтчәннәре» дигән әңгәмә-очрашу үткәреп тыл ветераннары Сәгыйтова Рәшидә апа һәм Ибәтуллиннар гаиләсенә бардылар.

ҖЧ “Юлбат” авыл хуҗалыгы җәмгыятендә язгы кыр эшләре тулы көченә бара. Хәзерге вакытта бөртекле культуралар чәчү буенча эш алып барыла.

Юлбат авыл зиратында авыл халкы белән зиратта өмә үткәрелде.

Бөек Җиңүнең 79 еллыгы якынлашкан көннәрдә, Юлбат авыл җирлегендә гомер кичерүче тыл хезмәтчәннәрен 10 нчы Федераль салым хезмәтенең Татарстан Республикасы буенча районара инспекциясе башлыгы Шафиков Айрат Вазыйх улы һәм авыл җирлеге башлыгы Шәмсиев Талип Рәшит улы котлап чыктылар. Аларга котлау сүзләре җиткерелде, Татарстан Республикасы Рәисе Миннеханов Р.Н һәм Саба районы Башлыгы Миннеханов Р.Н. исеменнән котлау открыткалары, бүләкләр тапшырылды.  

22 апрель көнне, “Гаилә елы уңаеннан”, Юлбат авыл китапханәсендә гаилә психологы, нейропсихолог Гайнуллина Зөлфия Рөстәм кызы белән чын күңелдән очрашу булды. “Гаилә кыйммәтләре” дип исемләнгән әлеге очрашуда  балалар, тормыш иптәше, гаиләдәге мөнәсәбәтләр турында җанлы әңгәмә корылды, четерекле сораулар каралып, аларның чишелү юллары эзләнде. Җылы һәм күңелле барган әңгәмәдән һәркем канәгать  калып, үзенә уйланыр һәм тормышын уңай якка үзгәртер өчен файдалы мәгълүмат алды.