ЯҢАЛЫКЛАР

Бүген Төбәк авылында яшәүче Васильева Мария Николаевнага 95 яшь тулды! Ул тумышы белән Мамадыш районыннан. Мамадыш педагогия училищесын тәмамлаганнан соң ул Мамадыш районы Теплое Поле авылында укыта башлый, аннан Владимир мәктәбенә күчерәләр.Аннан соң Балык Бистәсе районында укыта. Ә 1961 елда аның тормыш иптәше Иван Григорьевичны Төбәк авылына ветврач итеп җибәрәләр. Иван абый белән бергә Мария апа да килеп, Төбәк мәктәбендә башлангыч классларны укыта башлый. Аның 40 ел педагогик стажы бар. Без аны шушы күркәм юбилее белән чын йөрәктән котлыйбыз! Аңа хәерле озын гомер, саулык телибез!

Олы Кибәче авыл җирлегендә татар халкының милли бәйрәме Сабантуй гөрләп узды. Татар эстрадасының күренекле артистлары Газинур Фарукшин, Рәсим Низамов, Зәринә Хәсәншина үзләренең матур җырларын бүләк иттеләр. Сабантуйның алып баручысы Ильмир Ямалов уеннарны югары дәрәҗәдә күңелле итеп оештырды. Халык бәйрәмнән бик канәгать булып таралды. Татарча көрәштә абсолют батыр булып Төбәк авылыннан Тәлгать Хәмидуллин калды.

Олы Кибәче урта мәктәбендә кече яшьтәге мәктәп укучылары өчен "Дуслык" җәйге ял һәм сәламәтләндерү лагере эшли. Анда балалар рәхәтләнеп ял итәләр. Көн саен төрле кызыклы уеннар уйныйлар, экскурсияләрдә булалар.

Олы Кибәче авылында күпфатирлы йорт янында "Безнең ишегалды" программасы буенча эш башланды.

Олы Кибәче авыл җирлеге зиратларында Корбан бәйрәме алдыннан чүп үләннәрен чабу оештырылды.

Олы Кибәче авыл җирлегенең барлык авылларында да Сабантуй бирнәсе җыелды.

25 нче май көнне Олы Кибәче урта мәктәбендә "Бер очрашу -үзе бер гомер" дип исемләнгән очрашу булды. Укучылар белән  очрашуга якташларыбыз "Болгар " радиосының Яңалыклар бүлеге җитәкчесе Люция Рафаэль кызы Шәрәфиева, Питрәч районы Кощак мәктәбе директоры Лилия Хамидулловна Хәсәновалар кайтты. Очрашу истәлекләрне барлау, яшьлек елларын искә төшерү белән үрелеп барды. Укучыларга тормыш өчен кирәкле киңәшләр бирелде. Кичә ахырында инде 11 ел буе традициягә әйләнгән, Лилия ханымнын бабасы Вагыйз Шәфиков исемендәге премия тапшыру тантанасы булды. Аны быел укуда, спортта үзләрен күрсәткән укучыларыбыз Данияр Бәшәров һәм Ранис Мөбәрәкҗанов алды.  Люция апа үз премиясен туган тел өлкәсендәге тырыш укучыларыбыз Диләрә Харисова белән Зилә Шәрәфиевага тапшырды. Авылның киләчәге  өчен җан атып яшәүче авылдашларыбыз булуы белән  бик горурланабыз.

Олы Кибәче авыл җирлегендә үзара салым акчасы хисабына җирле автомобиль юлларны төзекләндерү башланды. Эшне "Рамазан" оешмасы башкара.

Төбәк авылында наймга 80/20 программасы буенча йорт төзелә башлады. Йортны ПМК-159 оешмасы төзи.

Менә тагын чираттагы уку елы тәмамланды. Бүген барлык мәктәпләрдә дә Соңгы кыңгырау чыңлады. Бу уку елында Олы Кибәче урта мәктәбен 4 укучы тәмамлый. Аларга алдагы укуларында һәм тормышта уңышлар телибез!