ЯҢАЛЫКЛАР

Әкият-гаҗәеп ил, анда иң гаҗәеп могҗизалар һәм Үзгәрүләр була. Әкиятләр безне тормышка өйрәтә, яхшылык һәм яманлык турында сөйли, дөньяны танырга ярдәм итә. 5 гыйнварда Ике басу Арташ авыл китапханәсенең мөдире балалар өчен "Яңа елда әкиятләр артында " дигән викторина оештырды. Балалар «Әкиятләрне беләсеңме?», «Табышмакларны чишегез», «Аермаларны тап» конкурсларында катнаштылар. Уен барышында балаларның әкият китаплары белән кызыксынулары ачыкланды һәм алар вакыт-вакыт бу китапларны яратып укыйлар. Барлык катнашучылар да бүләкләр алды.

​
5 гыйнвар көнне Саба район китапханәсендә 4 А, 4 Б (Сәләтле балалар өчен урта гомуми белем мәктәп-интернаты) һәм 1 Г (Саба гимназиясе) сыйныф укучылары өчен «Вощинадан шәм» ясау буенча мастер-класс оештырылды. 
Укучыларга үз куллары белән шәмнәр ясарга тәкъдим ителде. Иң беренче эш итеп китапханәче балаларга шәмне ясау ысулын аңлатты. Беренче карашка, шәм ясау бик җиңел эш дип күренсә дә балаларга тырышырга туры килде. Укучылар үзләренең фантазияләрен кулланып төрле формада шәмнәр ясадылар һәм декор элементлары белән бизәделәр. Мастер-класстан соң балалар журналлар белән таныштылар һәм өйгә укырга китаплар алдылар.

Каникуллар дәвам итә. 3 нче гыйнвар көнне Саба район китапханәсендә шәм, тәсбих һәм беләзек ясау буенча мастер класс үткәрелде. Балалар эш нәтиҗәләреннән уңай эмоцияләр, күтәренке кәеф һәм шат күңел белән киттеләр.

Яңа ел бәйрәмнәре - ул һәрвакыт уңай эмоция, күңелле аралашу, дусларың белән төрле уеннар уйнау. Кышны күпләр ярата, чөнки бу елның иң матур вакыты. Кыш көне генә чана, чаңгыда шуу, кардан ныгытма төзү, Кар бабай ясау мөмкинлеге бар.

2024 елның 4 гыйнварында, Үзәк мәйданда Саба балалар сәнгать мәктәбе балалар өчен «Күңелле стартлар» спорт уены оештырды. Барлыгы 55 бала катнашты. Программа бик бай иде. Башта балалар өлкәннәр белән бергә чыршы тирәли җыр җырлап әйләнделәр. Аннары бәйрәм эстафета рәвешендә уздырылды: 4 команда үзара ярышты.

Китапханә белән кышкы каникуллар күңелле, белемле һәм гадәти түгел. Бүген Чабья Чурчын авыл клубында ( бирү пунктында) шатлык, күңел ачу һәм дусларча аралашу атмосферасы хөкем сөрде.Олы Нырты авыл китапханәсе мөдире һәм Чабья Чурчи авыл клубы мөдире белән балалар өчен « яңа ел уенчыклары ясыйбыз« дигән мастер - класс оештырдылар .Чыршы уенчыкларын  күркәләрдән үз кулларың белән ясарга була. Алар ясау җиңел, матур һәм чыдам. Урман чыршысын  киендерү өчен, сатып алынган уенчыкларны кулланырга кирәк түгел. Матур чыршы уенчыгын хәтта гади күркәләрдәндә ясарга мөмкин. Торле агач күркәләре уникаль бизәкләр өчен бик яхшы материал. Чара башында балаларга күркәләр белән эшләү кагыйдәләре турында сөйләделәр, катнашучыларкүркәләрне  мишура белән бизәделәр, ясалма кар яудырдылар. Үз куллары белән ясалган яңа ел уенчыкларын балалар үзләре белән алып, яңа ел чыршыларын бизәделәр. Мастер-класс танып белү һәм бик күңелле атмосферада узды.

Яңа ел сәгатьләре сугар вакыт җитә. Әкияти, якты табигать, ап-ак кар, чыршы исе, төрле төстәге уенчыклар һәм утлар ялтырап тора. Бу бәйрәм һәрвакыт күп тәэсирләр, бүләкләр китерә. Ә Яңа ел  истә калырлык булсын өчен, бәйрәм кәефен булдырырга кирәк.

Бүген, 29 декабрьдә, балалар сәнгать мәктәбе укытучылары 158 укучы катнашында “90 нчы еллар стилендә” Яңа ел чарасы оештырдылар. Укытучылар әзерләгән бәйрәм программасы бу кичәдә булган һәркемгә үткәннәргә кайтып, әти – әниләре чорында узган Яңа ел тамашасын күзәтергә мөмкинлек тудырды. 90 нчы елларда уйнаган уеннарда катнашып, шул чор көйләренә биеп, укучылар үзләре дә күңел ачты.

26 декабрь балалар сәнгать мәктәбенең  Шәмәрдән филиалы укучылары өчен Шәмәрдән мәдәният йорты хезмәткәрләре катнашында "Яңа ел бәйрәме" үткәрелде. Матур итеп бизәлгән зал, балаларның якты музыкаль чыгышлары яңа ел алдыннан могҗиза һәм шатлык көтү атмосферасын тудырды! Кыш бабай һәм Кар кызы балалар белән чыршы тирәли әйләнеп, уеннар уйнадылар, табышмаклар әйтешеп, чыршы янында балалар шигырьләр укыдылар.

25 декабрь көнне Казанның «Татнефть-Арена» спорт сараенда Республика Яңа ел чыршысы узды. Чарада "Движение к мечте" дип аталган тамаша күрсәтелде. Бәйрәмгә бөтен республикадан балалар чакырылган иде. Алар арасында Андреева Мәрьям (Шәмәрдән лицее укучысы) һәм Әхмәтова Алинә (Саба гимназиясе укучысы)"Укучының мәдәни көндәлеге" конкурсының "Порталның иң актив кулланучысы" җиңүчеләре булдылар. Бәйрәмдә һәр балага яңа 2024 ел символы булган аждаһа рәвешендәге портфель бүләк ителде.

Узган елның соңгы көннәрендә нәтиҗәләр ясау, яңа планнар һәм идеяләр белән бәхетле, уңышлы елга бару өчен, башлаган бар нәрсәне тәмамлау мөһим. Иске елны истә тоту һәм хәтердә бары тик күңелле мизгелләр генә калдыру мөһим. Саба балалар сәнгать мәктәбе коллективы узып баручы елны якты, мавыктыргыч, матур итеп тәмамлый.

2023 елның 25 декабрендә отчет концерты һәм гомуми ата-аналар җыелышы булып узды. Программада иң якты, яхшы укучылар катнашты, аларның тырышлыгы, өзлексез хезмәте игътибарсыз калмады.

2023 елнын 19 hәм 22 декабрь көннәрендә Хөснулла hәм Аллаhияр Валиуллиннар исемендәге Саба балалар сәнгать мәктәбендә бию сыйныфы укучыларын 1 класслар сафына алу кичәсе үтте. Кичәне сәнгать мәктәбе директоры урынбасары Ярмөхәммәтова Г.З. алып барды, чакырылган әти-әниләр белән кызыклы конкурслар уздырды. Кичә барышында ике әкият герое "Укымыйча гына белемле булып буламы, юкмы?- дигән сорауга җавап эзләделәр. Балалар әти-әниләренә 4 ай дәвамында  "Гимнастика" hәм "Ритмика" дәресләрендә укытучылары Мөбарәкҗанова А.З. өйрәткән күнекмәләрен эшләп күрсәттеләр.