ЯҢАЛЫКЛАР

Татарстан Республикасы  көне уңаеннан балалар сәнгать мәктәбенең Шәмәрдән филиалы укучылары өчен мастер-класс үткәрелде.

27 августта «Ямьле Саба» яр буенда Салават Фәтхетдиновның Республика көненә багышланган бәйрәм концерты булды. Концерт ике сәгать дәвам итте, Салават иҗатын яратучыларның күбесе аңа чыгыш дәвамында аягүрә басып җырлады. Җырчы җырлар арасындагы тәнәфесләрдә тамашачылар белән төрле темаларга аралашты.

Саба балалар сәнгать мәктәбе укучылары өчен "Мәңге яшә,минем  Татарстан" уены үткәрелде.

Мишә авыл җирлеге Килдебәк авыл җирлеге белән берлектә Тимыршык авылында балалар катнашында «Күңелле ял итегез» дип исемләнгән концерт оештырдылар. Концерт Туган телләр һәм Халыклар бердәмлеге елына багышланган иде. Күчмә концертлар-ул үзеңне, үз осталыгыны, үз иҗатыңны күрсәтү мөмкинлеге. Ә балалар өчен бу бәһасез тәҗрибә, алар аны мәңгегә истә калдырачак. Концерт искиткеч, дәртле булды. Балалар төрле күңелле биюләр биеделәр, шигырьләр сөйләделәр, уен коралларында уйнадылар, татар җырларын җырладылар, гимнастик биюләр башкардылар. Тамашачылар яшь артистларыбызны көчле алкышларга күмделәр.

Шекше мәдәният йортында көтеп алынган мөһим вакыйга булды, авыл халкы алдында Татарстан Республикасы Дәүләт җыр һәм бию ансамбле чыгыш ясады. Егерменче йөзнең 30 нчы елларында ук нигез салынган коллектив республикабызның бөтен дөньяда визит карточкасы булып тора, артистлар башкаруында матур җырлар яңгырый һәм татар халкының кабатланмас биюләре тәкъдим ителә. Тамашачыларның мәхәббәтен һәм хөрмәтен яулаган ансамбльнең хезмәте барлык мактауларга һәм бүләкләргә лаек.
Бу кичтә Шекше һәм Алан - Елга авылларында яшәүчеләргә чын сәнгать белән хозурлану мөмкинлеге тудырылды. Әлеге чара Саба районы, мәдәният бүлеге җитәкчелеге теләктәшлеге һәм "Игенче" ҖЧҖ ярдәме белән оештырылды. Концерт тәмамланганнан соң тамашачылар ансамбльне аягүрә басып алкышладылар, мәдәният бүлеге начальнигы Р.Ф. Заһидуллин исеменнән рәхмәт сүзләре яңгырады.

Лесхоз мәдәният йорты һәм китапханә хезмәткәре Килдебәк авыл мәдәният йорты һәм Лесхоз бистәсе балалары белән берлектә «Күңелле ял итегез» дип исемләнгән картлар йортында тәрбияләнүчеләр өчен концерт оештырдылар һәм үткәрделәр.
Картлар йорты-ул шундый җир, кайда игьтибар беркайчанда аз тугел. Без мәдәният йорты хезмәткәрләре аларга ешрак килергә һәм аларны концерт номерлары белән сөендерергә тырышабыз. Бүген дә безне яратып каршы алдылар. Ә без аларны гармунчылар чыгышы, җырлар, татар биюе белән сөендердек, шулай ук балалар җырлар җырладылар, шигырьләр сөйләделәр, биеделәр. Концерт күңелле үтте.

17 август көнне Иске Мичән мәдәният йорты хезмәткәрләре авылдашлар өчен "Ямьле Саба"проекты буенча экскурсия оештырдылар. Туристлар Саба Урман хуҗалыгы тарихы музеенда һәм "Туган якны өйрәнү" музеенда булдылар.Дендро бакчага экскурсия уздырдылар. Бакча территориясендә "Ябалакта кунакта"булдылар. Аннан соң "Сабантуй"мәдәни-күңел ачу комплексында булдылар. Музей хезмәткәрләреннән кызыклы һәм файдалы мәгълүмат алдылар, шулай ук Тамчыгөл Рафаил кызы районның истәлекле урыннары турында сөйләде. Көн бик кызыклы һәм нәтиҗәле узды. Барысы да бик канәгать калдылар, онытылмас тәэсирләр алып кайттылар.

Эзмә мәдәният йорты территориясендә Ике басу Арташ, Олы Арташ, Яз. Арташ һәм Сабабаш авыл мәдәният йортларының яшь талантлар концерты булып узды. Концерт Татарстанда туган телләр һәм Халык бердәмлеге елына багышланган иде, анда республика халыкларының искиткеч балалар җырлары һәм биюләре, скрипка көйләре яңгырады, шулай ук "Сугыш балалары" музыкаль композициясендә һәм "Минем ветераннарым" җырында сугыш еллары темасына кагылып үтелде. Тамашачылар һәр катнашучыны җылы алкышлар белән каршы алдылар һәм озаттылар.
Балаларга яңа аудиториядә һәм бөтенләй таныш булмаган тамашачы алдында чыгыш ясау мөмкинлеге биргән өчен җитәкчеләргә рәхмәт сүзләрен җиткерәсем килә.

Оет авыл клубы янында балалар һәм яшүсмерләр катнашында "Җырлы балачак илендә" дип исемләнгән урам концерты булып үтте. Концерт барышында дәртле биюләр, җырлар, шигырьләр башкарылды. Яшь артистларыбызның чыгышлары кызыклы һәм истә калырлык булды. Концерт тамашачыларга бик ошады.

Шекше авыл мәдәният йорты һәм китапханә хезмәткәрләре "Күңел ачабыз, уйныйбыз, бер дә тик тормыйбыз" дип исемләнгән чара оештырдылар. Балалар "Атлантида" һәм "Сәяхәтчеләр" командаларына тупланып,​ ерак джунглиларда "Югалган дөнья" га,​ мавыктыргыч сәяхәткә кузгалдылар. Финишка бару юлында аларга төрле сынаулар аша үтәргә туры килде: бармак эзләрен табарга, пластилин гына кулланып динозавр рәсемен буярга,​ "Югалган дөнья"​ картасын ясарга. Балалар китаплар ярдәмендә сүзләрне шифрларга өйрәнделәр һәм үзара алмашып,​ бер-берсенең яшерелгән сүзләрен укыдылар. Катнашучылар аеруча "Берни дә күрмим, берни дә ишетмим" дигән уенны яраттылар, алар кабат- кабат яңа сүзләр әйтүне сорадылар. Чара ахырында балалар кул астындагы әйберләрне кулланып "Шау-шулы оркестр" оештырдылар. Биремнәрне үтәү өчен командаларга фантазия, эрудиция, фикерләү тизлеген һәм​ иҗади сәләтләрен күрсәтергә туры килде. Күңел ачу күмәк биюләр белән дәвам итте, катнашучы командалар мәдәният хезмәткәрләре тарафыннан әзерләнгән лаеклы бүләкләрен дә алды.