ЯҢАЛЫКЛАР

Шушы көннәрдә Казанда бюджет өлкәсе оешмаларының исәп-хисап эшендәге  яңалыкларга багышланган семинар булып узды. Анда Финанс-бюджет палатасының һәм Үзәкләштерелгән бухгалтерияның бүлек җитәкчеләре, бухгалтерлары, авыл җирлекләренең бухгалтерлары катнашып кайттылар. Семинарны «Сенсум» компаниясе «Актионгрупп» медиагруппасы белән берлектә үткәрде.

Финанс-бюджет палатасында хезмәт куючылар районда узып килүче спорт чараларында актив катнашып киләләр. Хатын-кызлар арасында барган волейбол Чемпионатында безнең оешмадан ике команда катнашты. Нәтиҗәдә, Саба гимназиясе командасыннан беразга гына калышып, “ФБП-1” командасы 4 урын яулады. Эльмира Вәлиева ФБП командасының иң яхшы уенчысы, Гөлнара Заһидуллина “Муниципаллар” командасының иң яхшы уенчысы исеменә лаек булдылар.

Бөек Җиңү көненә багышланган җиңел атлетика йөгерешендә Финанс-бюджет палатасы белгече Эльмира Валеева да катнашты. 3 км.дистанцияне уңышлы үтеп, ул 3нче урынга лаек булды.

Финанс-бюджет палатасының бүлек җитәкчесе Гөлнара Заһидуллина  исәп-хисап эшләрендәге яңалыклар буенча үткәрелгән республика семинарында катнашты. Семинар барышында кызыклы һәм актуаль темалар күтәрелде. Бухгалтерлык исәбенең электрон документларының унификацияләнгән формалары буенча, шулай ук эчке контроль һәм аудит үткәрү өчен мәгълүмат чыганагы буларак дәүләт һәм муниципаль учреждениеләрнең хисаплылыгы буенча да сөйләшү алып барылды.

Әлеге күркәм һәм олы эшкә  Финанс – бюджет палатасы да бик теләп кушылды. Батырларның мәңгелек данын саклау йөзеннән агачлар утыртылды. Киләчәктә әлеге агачлар үсеп, киләчәк буын Бөек җиңү көнен истә тотып, тыныч тормышка хозурланып яшәрлек булсын иде.

9 май - Бөек Җиңү көнендә Финанс - бюджет палатасы бердәм катнашты. Безнең тарафтан халыкка театральләштерелгән тамашада 1945 елның җиңү көнен алып килгән мизгелләр тәкъдим ителде. Яу кырыннан кайтып килүче сугышчы егетләрне кызлар, әниләр, апалар каршы ала.
. Ил - җирләребездә тынычлык урнашсын! Күкләребез һәрчак аяз булып, һәр гаиләдә иминлек булсын.

Офис хезмәткәре көненә багышланган чарада Финанс - бюджет палатасы хезмәткәрләре дә актив катнашты. Төрле төр ярышлар бер сулышта узды. Безнең егетләр - кызлар "Карьерные гонки" номинациясендә 3нче урын яуладылар, шулай ук Динә Гильманова "Кассир" номинациясендә 3 нче урынга лаек булды.

Бу көннәрдә Үзәкләштерелгән бухгалтерияда хезмәт куеп, лаеклы ялда булган ветераннарыбыз үзләренең гомер бәйрәмнәрен билгеләп үтәләр. Әхмәтшина Хаҗәр Шамил кызын 70 яшьлек, Зарипова Гүзәлия Миншәех кызын 65 яшьлек юбилейлары белән чын күңелдән тәбрик итәбез, аларга сәламәтлек, иминлек, тыныч тормыш телибез. Әлеге күркәм юбилей уңаеннан аларның һәр икесенә истәлекле бүләкләр һәм Саба муниципаль районы башлыгының Рәхмәт сүзе тапшырылды. Ветераннарыбыз да үз чиратларында район башлыгы Рәис Нургали улы Миңнехановка, оешма җитәкчесе Шәмсун Әкбәр улы Сөнгатовка, бергә эшләгән хезмәттәшләренә игътибар һәм бүләкләр өчен рәхмәтләрен җиткерделәр, матур теләкләре аша хезмәт юлларында уңышлар теләделәр.

Бөек җиңүнең 80 еллыгы уңаеннан “Утлы еллар кайтавазы” әдәби марафонында Финанс – бюджет палатасы хезмәткәрләре дә бердәм катнаштылар. Нәтиҗәдә, коллектив “Иң актив оешма” номинациясендә 1 урынга лаек булды. Марафон Саба районы китапханәсе тарафыннан оештырылды.  

Бу көннәрдә Назлыгөл Нуруллина, "ОНИКС" белем бирү үзәге укучысы, хезмәттәшебез Гүзәл Нуруллинаның кызы татар теле һәм әдәбиятыннан XII Халыкара олимпиадада катнашты һәм җиңүче Дипломына ия булды. Халыкара олимпиада җиңүчеләрен Туган тел форумы кысаларында тәбрикләделәр. Олимпиаданың дистанцион һәм республика этапларында 10 меңнән артык укучы һәм студент катнашып, йомгаклау этабында 4 чит илдән һәм Россиянең 28 төбәгеннән 500 катнашучы чакырыла. Назлыгөлне шундый масштаблы чарада зур җиңү яулавы белән тәбрик итәбез!

Күренекле галим һәм мөгаллим Каюм Насыйри фикере: "Берәү чит телне өйрәнәсе булса, башта үз телен яхшы белсен!"