Муниципаль районнар Саба муниципаль районы

Байлар Сабасында 2025 нче ел өчен үзара салым акчасын җыю эше бара

2024 елның 13 ноябре, чәршәмбе

Билгеле булганча, Байлар Сабасы бистәсендә яшәүче гражданнарның 2025 нче ел өчен үзара салым акчасын җыю буенча үткәрелгән җыелышларның йомгаклау карары нигезендә, ачык тавыш бирү юлы белән, бистәне төзекләндерү өчен һәр балигъ булган кешедән 500 сум акча җыюга ризалык бирелде. Аның нигезендә халыктан әлеге акчаны җыю эше бара. Нигезләмәгә таянып, әлеге акчаны 31 нче декабрьгэ кадәр җыеп бетерү таләп ителә. Аны Байлар Сабасы бистәсе, Мәктәп урамы, 31 А йорты адресы буенча эш көннәрендә Саба шәһәр җирлеге җирле үзидарә органнары урнашкан бинага килеп түләргә мөмкин (шимбә көнне 11:30 кадәр дә кабул итәбез). Шулай ук оешма, учреждение, предприятиеләрдән чакырулар кабул итәбез һәм урынга барып эшне оештырабыз. Әлеге акчалар бистәне төзекләндерү өчен тотылачагын истән чыгармыйк, димәк, үзебезгә уңайлы һәм матур булсын өчен тырышабыз.

Тэги: Саба шәһәр җирлеге

Саба шәһәр җирлеге

БАРЛЫК ЯҢАЛЫКЛАРНЫ УКУ

СОҢГЫ ЯҢАЛЫКЛАР

ноябрь, 2024 ел

“Песнәкләр – якын дуслар” экологик сәгать

12 ноябрь - Песнәкләр көне булып санала. Россиядә ул көн әле яңа гына билгеләнеп үтелә башлады. Әлеге дата очраклы гына сайланмаган. Бу көнне кешеләр кышлаучы кошларны каршы алганнар, аларга җимлекләр ясаганнар, искеләрен чистартып җимнәр салганнар. Кешеләрдә бу кошлар уңыш китерә дигән ышану да булган. Иләбәр авыл китапханәсендә “Умырзая” балалар бакчасына йөрүче балалар өчен “Песнәкләр – якын дуслар” дигән исем астында экологик сәгать уздырылды. Чарада катнашучыларга әлеге кош турында бай мәгълүмат җиткерелде. Песнәккә багышланган хикәяләр, шигырьләр белән танышканнан соң балалар песнәк рәсемен буядылар,табышмакларга җаваплар эзләделәр.

«Журналлы яфрак кою» могҗизалар кыры уены

Хәзерге җәмгыять тормышында вакытлы матбугатның әһәмияте зур. Вакытлы матбугат безнең илдә һәм чит илләрдә барган вакыйгалар турында кызыклы һәм танып белүле мәгълүмат бирә, көннән-көн тормышыбызның елъязмасын алып бара, файдалы киңәшләр бирә һәм укырга һәм өйрәтергә ярдәм итә. 12 ноябрь көнне Шәмәрдән авыл һәм балалар китапханәсендә «Дуслык» хатын-кызлар клубы өчен «Журналлы яфрак кою» могҗизалар кыры уены үткәрелде. Клуб хатын-кызлары уенда бик теләп катнаштылар. Шулай ук хайваннар һәм үсемлекләр дөньясыннан, тарихтан, географиядән, сәнгатьтән, әдәбияттан, мавыгулардан һәм хоббилардан төрле темаларга кызыклы, мавыктыргыч мәкаләләр туплаган файдалы басмалар белән таныштылар.

"Песнәкләр көне" экологик сәгать

Россиядә кошларны саклау берлеге инициативасы белән экологик бәйрәм — Песнәкләр көне билгеләп үтелә. Борынгы ук бу көн кышлаучы кошларга багышланган көн булган. Явлаштау авыл китапханәсендә әлеге бәйрәмгә багышланган экологик сәгать үткәрелде. Балалар Песнәкләр көне тарихы, халык сынамышлары һәм әлеге кошлар белән бәйле кызыклы фактлар турында белделәр. Чарада катнашучылар кышлаучы кошлар турындагы табышмаклар чиштеләр, «Кошны таны» уенын уйнадылар һәм песнәкләр турындагы китаплардан өзекләр укыдылар.

«Китапханә-китаплар йорты» китапханә белән танышу экскурсиясе

13ноябрь көнне Саба район балалар китапханәсе Саба урта мәктәбе китапханәсе белән берлектә 1 “А”, "Б" сыйныф укучылары өчен «Китапханә-китаплар йорты» дип исемләнгән китапханә белән танышу экскурсиясен үткәрделәр. Китапханәчеләр укучыларны «китапханә», «укучылар формуляры», «каталог» төшенчәләре белән таныштырдылар. Китапларның төрләрен һәм китапны ничек сайларга кирәклеген сөйләделәр. Чара ахырында укучылар үзләре укый ала торган китапларны сайлап, өйләренә алдылар.

ЯҢАЛЫКЛАРГА ЯЗЫЛУ