Авыл хуҗалыгы һәм эшкәртү сәнәгате хезмәткәрләре көне
13 октябрьдә, иң мөһим бәйрәм- Авыл хуҗалыгы һәм эшкәртү сәнәгате хезмәткәрләре көне билгеләп үтелә. Сатыш авылы мәдрәсә музее хезмәткәрләре укучылар өчен 45 ел хезмәт стажы булган Татарстан Республикасының атказанган авыл хуҗалыгы механизаторы Габдрахманов Хәмит Кәримулла улы белән очрашу үткәрделәр. Габдрахманов Х.К.- хезмәт сөючән, югары эшкә сәләтле, үзенә ышанып тапшырылган техникага сакчыл карый торган техник белемле белгечнең үрнәге булып тора, яңа техниканы һәм агрегатларны өйрәнүгә һәм куллануга бик җаваплы карый торган механизаторларның берсе. Зур хезмәт стажы булган тәҗрибәле механизатор буларак, яңа уку йортын тәмамлап кайткан яшьләр өчен дә ул остаз булып тора. Габдрахманов Хәмит Кәримулла улы укучыларның һәр соравына җавап бирде, тырышып укырга, спорт белән шөгыльләнергә киңәш итте һәм аларга үз булачак һөнәреңне дөрес сайларга кирәк икәненә ныклы басым ясады.