Саба районы мәдәният хезмәткәрләре өчен хореография буенча "Чабата биюе" темасына мастер-класс.
15 февральдә Хөснулла һәм Аллаһияр Вәлиуллиннар исемендәге Саба балалар сәнгать мәктәбендә "Чабата биюе" темасына хореография буенча мастер-класс булып узды . Мастер-класста Саба районы авыл мәдәният йортлары, китапханә хезмәткәрләре катнашты. Бию мастер-классын Саба балалар сәнгать мәктәбе хореографы Мөбарәкҗанова А. З. үткәрде. Кереш сүзендә ул борынгы заманнардан килгән "Чабата" татар биюе турында сөйләде. Биюнең үз ритмы бар, ә аның хәрәкәтләре башкаларныкына охшамаган. Чабата - ул туры үрелгән, кырыйлары тәбәнәк итеп эшләнелгән аяк киеме.Татар халкында эш аяк киеме буларак хезмәт иткән. Аларны ак тула оек белән кигәннәр.
Мастер – класста профессиональ хореограф артыннан кабатлап, катнашучылар төп йөреш, тыпырдау, бау хәрәкәтләрен өйрәнделәр. Чара ахырында катнашучылар алган күнекмәләрен күрсәттеләр.Чараның музыкаль бизәлешен Абдуллин Р.Х., Султанов С.Н. тәэмин итте. Мастер-класста алган күнекмәләр районның авыл мәдәният йортлары хезмәткәрләренә төрле бәйрәм чаралары үткәргәндә ярдәм итәчәк. Катнашучыларның барысына да сертификатлар тапшырылды.