Килдебәк авылында тантаналы митинг
8 нче майда, Бөек Ватан сугышында җиңүнең 78 еллыгын бәйрәм итү уңаеннан, Килдебәк авылы мәдәният йортында тантаналы митинг үткәрелде. Әлеге митингта Килдебәк урта мәктәбе укучылары һәм укытучылары, авылдагы оешма җитәкчеләре һәм хезмәткәрләре, тыл ветераннары, авыл халкы һәм бәйрәмгә килгән кунаклар катнашты. Укучылар мәктәптән сугыштан катнашкан авылдашлар истәлегенә эшләнгән стела янына кадар бабаларының рәсемнәрен күтәреп хәрәкәт иттеләр. Бәйрәмне мәдәният йорты хезмәткәрләре ачып җибәрделәр, аннан соң бәйрәм укучыларның Җиңү көне уңаеннан әзерләнгән концерт номерлары белән дәвам итте. Митингта катнашучыларны авыл җирлегендә урнашкан оешма җитәкчеләре һәм районнан килгән вәкил – 129 нчы номерлы янгын-коткару бүлеге җитәкчесе И.Г. Закиров, Татарстан Дәүләт Советының VI чакырылыш депутаты М.И. Галиев бәйрәм белән котлап, ил-җирләребездә иминлек, тынычлык булсын дигән теләкләрен җиткерделәр. Шулай ук митинг барышында сугыштан катнашкан авылдашлар истәлегенә эшләнгән стела чәчәкләр куелды һәм Бөек Ватан сугышында хәлак булган әби-бабаларыбыз бер минут тынлык белән искә алынды. Митинг агач утырту белән тәмамланды.