Кукмара бистәсендә үткән хоккей буенча турнирда районның «Тимерхан» командасы лаеклы 1 урынны яулады.

2023 елның 27 апреле, пәнҗешәмбе

Кукмара бистәсендә үткән хоккей буенча турнирда районның «Тимерхан» командасы лаеклы 1 урынны яулады. Турнир ике истәлекле датага багышланып, физик культура һәм спорт өлкәсендә дәүләт идарәсе органнары оешуның 100 еллыгы һәм Бөек Җиңүнең 78 еллыгы уңаеннан оештырылды. Киеренке көрәш нәтиҗәсендә спортчыларыбыз кабат җиңү яулады! Барыбызга да таныш җыр юллары кабат искә төшә «Хоккей чын ир-атлар уены!” «В хоккей играют настоящие мужчины!». Ә бу чынлап та шулай бит! Команда составында безнең район башлыгы Рәис Нургали улы Миңнеханов та уйный.

     "Көндәшләр көчле, уен кызыклы. Барысы да шәп!” команданың уенчылары шундый фикер белән уртаклашты. Коллегабыз, Үзәкләштерелгән бухгалтерияның бүлек җитәкчесе Ленар Фәйзетдинов өчен дә без бик шат. Ул команда составында инде күп еллар уйный һәм ярыш - турнирларда җиңүгә үз өлешен кертә. Ә без, үз чиратыбызда, команданың алга таба да зур җиңүләргә һәм югары нәтиҗәләргә ирешүен телибез.