Әдәби-интеллектуаль уен "Мин кулыма китап алам".
Уку елының иң озын чиреге дә ахырына якынлашып, язгы каникуллар да җитте. Каникулларны файдалы һәм күңелле итеп уздыру максатыннан, Саба район балалар китапханәсендә төрледән- төрле чаралар узачак. 28 март көнне Саба гимназиясенең һәм "Сәләтле балалар мәктәбе" нең 1 сыйныф укучылары өчен “Мин кулыма китап алам” дип исемләнгән әдәби-интеллектуаль уен үткәрелде. Әлеге уен “Укучының мәдәни көндәлеге” буенча оештырылды. "Укучының мәдәни көндәлеге" балаларны һәм аларның әти-әниләрен мәдәният учакларына барырга кызыксындыру, укучыларны һәм олыларны рухи яктан баету максатын күздә тота. Алай гына да түгел, көндәлек укучыда аралашу күнекмәләрен булдыра, гражданлык позициясен, туган якка мәхәббәт һәм ватанпәрвәрлек хисе тәрбияли. Уен 5 өлештән: “Туган ягым Татарстан”, “Әкиятләр илендә”, “Татар халкының милли уеннары”, “Серле сандык” һәм онлайн-сәхифә балалар шагыйрәсе Йолдыз Шәрапованың “Китаплы кич” китабы белән таныштырудан торды. Укучылар сынатмадылар, актив җавап биреп үз белемнәрен, осталыкларын күрсәттеләр.