Сабантуй Мусульман
21 нче июль көнне Лесхоз бистәсендә “Мөселман Сабантуе”н Коръән укып, дога кылып башладылар. Чараны оештыруда Лесхоз мәдәният йорты хезмәткәрләре дә катнашты. Балалар йөгерә-йөгерә, дога, Коръәннән сурәләр уку, мөнәҗәтләр әйтү ярышларында актив катнаштылар. Бик сәнгатьле итеп ихластан мәкам белән укыдылар. Мөнәҗәтләрне моңлы тавыш белән суздылар. Өйлә намазы җитү белән бөтен уеннар туктатылды. Алып баручының: “Барлык уеннарны туктатабыз, Аллаһ каршында бурычларны үтәр вакыт җитте. Җәмәгать, әйдәгез, әзерләник!” - дигән тавыш яңгырады. Бәйрәмгә кызлар ак яулыклардан, малайлар түбәтәйләрдән килгәннәр. Күз дә алырлык түгел.
Бәйрәмдә төрле уеннар, ярышлар, кыйммәтле бүләкләр, татлы ризыклар белән викториналар һәм конкурслар оештырылды; кул көрәше, капчык киеп йөгерү, чүлмәк вату, таяк тарту, күз бәйләп бүләкләр кисү, капчык белән сугышу, милли көрәш һәм башка уеннар белән үрелеп барды.