ЯҢАЛЫКЛАР
Бу ял көннәрендә Олы Кибәче авыл зиратында өмә оештырылды. Иске, корган черегән агачлар һәм куаклар киселде. Зират биләмәсе киселгән чыбык-чабыктан, ботаклардан чистартылды. Өмәдә катнашучыларга олы рәхмәтләребезне җиткерәбез!
17 сентябрь көнне Олы Кибәче авыл клубында Педагог һәм остаз елына багышланган зур концерт булды. Концертта татар эстрадасының күренекле артистлары Алмаз Мирзаянов, Зөлфирә Шәйдуллина, Илсөя Бәдретдинова, Динә Закирова чыгыш ясадылар. Шулай ук Әлфия Поташова, Алмаз Зәкиев, Кашаповлар, Мөхәммәтхановлар гаиләләре дә тамашачыларга үзләренең матур җырларын, биюләрен бүләк иттеләр. Килгән артистларны һәм тамашачыларны кайнар мич коймагы һәм чәй белән каршы алдылар. Болар барсы да безнең якташыбыз, шәхси эшмәкәр Шәфиков Рифкат Зыятдин улыннан бүләк булды. Шундый күңелле бәйрәм оештырганы өчен Рифкат абыйга һәм аның гаиләсенә олы рәхмәтләребезне җиткерәбез!
16 сентябрь көнне Олы Кибәче авыл җирлегендә "Милләтләр кроссы" дигән бөтендөнья йөгерү көненә багышланган йөгерү ярышлары булып узды. Йөгерүдә Олы Кибәче балалар бакчасы балалары, Олы Кибәче урта мәктәбе укучылары, җирлектәге бюджет оешмалары җитәкчеләре һәм эшчеләре катнашты. Җиңүчеләргә авыл җирлеге башлыгының дипломнары һәм бүләкләр тапшырылды.
"Саба" ҖЧҖ Кибәче бригадасында маллар өчен кукуруздан силос әзерләнә. 360 гектар кукуруз җиреннән 5 КамАЗ машинасы, 1 Нью-Холланд тракторы көнгә 12-15 рейс силос ташый. Бүгенге көнгә 5117 тонна сусыл азык әзерләнгән.
Олы Кибәче авыл җирлегендә бер төркем инициатив хатын-кызлар махсус хәрби операция зонасына җибәрү өчен маскировка сеткасы үрү белән шөгыльләнәләр. Сетка үрү өчен Гәлиәхмәтов И, Гатиәтуллин Ә һәм Фәләхиев А башта стан ясадылар. Ә хатын-кызлар сеткага тасмалар бәйли.
Ял көннәрендә Олы Кибәче авыл зиратында өмә оештырылды. Зиратның биләмәсен корган агачлардан, чүп-чардан һәм чүп үләннәреннән чистарттылар. Өмәдә катнашкан һәм тырышып эшләгән барлык ир-егетләргә рәхмәт белдерәбез.
"Саба" ҖЧҖ Кибәче бригадасы басуларында көзге кыр эшләре бара. Т-150 тракторында Бәширов Илдус һәм МТЗ-1221 тракторында Дәүлиев Илсур җирне туфрак астына сөрәләр. Көндәлек 7-9 га җир эшкәртелә.
Төбәк авылында балалар һәм спорт мәйданчыгын төзекләндерү эше төгәлләнде. Эшләр гражданнарның үзара салым акчасы хисабына башкарылды. Объектны төзекләндерү эше белән шәхси эшмәкәр И.Ф.Нәбиуллин оешмасы шөгыльләнде.
Төбәк сөтчелек комплексында мөгезле эре терлекләргә монокорма әзерләп ашатыла. Монокорма әзерләүдә Әскәров Инсаф һәм тракторчы Мөбәрәкҗанов Рәмзил зур тырышлык куеп эш башкаралар. Әзерләнгән ризыкны сыер торакларына таратуны тракторчы Гилметдинов Азат башкара. Сыерлар алдынды азык көне буена җитәрлек тора. Комплекста 660 савым сыеры бар, көненә 15 т сөт савып алына.
1 сентябрь- Белем бәйрәме. Олы Кибәче урта гомумбелем бирү мәктәбендә дә бу бәйрәм билгеләп үтелде. Бу уку елында 1 нче сыйныфка 2 бала укырга керде, ә мәктәптә барлыгы 79 укучы белем алачак. Барысын да бәйрәм белән тәбрик итәбез һәм яңа уку елынды уңышлар телибез!