ЯҢАЛЫКЛАР

 Саба район балалар китапханәсендә “Мин кулыма китап алам” дип исемләнгән әдәби-интеллектуаль уен үткәрелде. Әлеге чарада Арча районыннан Татарстан Республикасы экология һәм табигый байлыклар министрлыгының Төньяк территориаль идарәсе начальнигы Касыймов Ленар Әдехәм улы, 1 категорияле белгече Зәйнуллина Ләйсән Рүзил кызы, Татарстан Республикасы экология һәм табигать ресурслары министрлыгының Төньяк территориаль идарәсенең өлкән белгече Билалов Ришат Мидехәт улы катнаштылар. Уен 5 өлештән: “Урман-табигать күрке”, “Тапкырларга табышмак” , “Табигать сынамышлары”,  “Сөйләгәнне танып бел”, “Серле сандык” торды. Укучылар сынатмадылар, актив җавап биреп үз белемнәрен, осталыкларын күрсәттеләр. Саба үзәкләштерелгән китапханәләр системасы директоры Билалова Ләйсән Рәкыйп кызы “Экология” төшенчәсе белән таныштырды. Шулай ук, укучыларның әйләнә-тирәлекне, сулыкларны саклауга ничек өлеш кертә алулары турында да сөйләде. Әдәби- интеллектуаль уенда актив катнашканнары өчен укучыларга истәлек бүләк белән бүләкләнделәр

А. Кәримуллин исемендәге Саба район китапханәсе хезмәткәрләре һәм балалар китапханәсе Урта Саба авыл клубы белән берлектә «Табигать бүләкләре» дигән экологик сәгать үткәрделәр. Чара барышында балаларга тормышыбызда табигатьнең әһәмияте, табигатькә зыян китермәс өчен үзеңне ничек тотарга кирәклеге турында аңлатылды.«Агачны яфрак буенча бел», «Тере барометрлар», «Табигый чылбыр» дигән конкурслар үткәрелде. Аларда балалар кошлар һәм бөҗәкләр тәртибе буенча һава торышын ничек белергә икәнлеген аңлаттылар, безнең төбәктә нинди агачлар һәм үсемлекләр үсүен сөйләделәр, шулай ук төрле хайваннар һәм кошларны сурәтләделәр. Чара табигать, туган як турындагы мәкальләр һәм әйтемнәр бәйгесе белән тәмамланды. Чарада катнашкан Һәркем экологик проблемалар турында уйланды, табигатькә сакчыл карарга кирәклеген аңлады.

Китаплар безне кечкенәдән каршы алалар һәм гомер буе озаталар. 27нче октябрь көнне Саба район балалар китапханәсендә  3нче номерлы "Шоколад" балалар бакчасының зурлар төркеме балалары өчен «Китаплар төрле була» дип исемләнгән китапханә дәресе үткәрелде.  Балалар китапханәдә бик күп төрле формада  китаплар барлыгын белделәр. Үз куллары белән тотып карап, китаплар турында мәгълүмат алдылар. Шулай ук китап басмалары белән эш итү кагыйдәләрен искә төшерделәр, табышмаклар чиштеләр һәм әкият викторинасы сорауларына җавап бирделәр.

Явлаштау авыл мәдәният хезмәткәрләре Иләбәр авыл китапханәсе белән берлектә Эзмә- Иләбәр- Өтернәс авыллары янындагы тарихи урын- Калатауда “Тарих эзләре буйлап “ дип исемләнгән тарихи сәгать уздырдылар. Иләбәр авыл китапханә мөдире Вәсилә Галиева безгә бу борынгы шәһәрнең тарихы турында сөйләп зур кызыксыну уятты. 1553 елда татарлар төзегән шәһәрчек вакытлыча татарларның башкаласы ролен үти. 1998 елда археологлар башлап җибәргән казу эшләре вакытында Казан ханлыгы чорына карый торган казылмалар табылуын һәм тагын бик күп мәгълүматлар белдек. Тарихыбызны өйрәнү, барлау юнәлешендә шундый экскурсияләр иң нәтиҗәле алым булып тора.

25 октябрьдә Саба район китапханәсенең уку залында шагыйрә, «Мишә дулкыннары» язучылар клубының актив әгъзасы Манихова Миңнегөл Вахит кызының 75 яшьлек юбилей кичәсе узды. "Ижатта узган гомер" – бәйрәм кичәсенә "Сабагаз" эксплуатация-җитештерү идарәсе башлыгы Ирек Исмәгыйль улы Мөхетдинов, "Саба дулкыннары" телерадиокомпаниясе җитәкчесе Әлфия Мөбәрәкова юбилярга үзләренең ихлас теләкләрен җиткерделәр. «Мишә дулкыннары» һәм «Сөембикә»клубларына йөрүчеләр юбилярны шигырь юллары белән котладылар. Район мәдәният йортыннан Хәниф Тимербаев котлауларын җыр аша җиткерде. Чара ахырында үзәкләштерелгән китапханә системасы директоры Билалова Ләйсән Рәкыйп кызы коллектив исеменнән җылы котлап Рәхмәт хаты һәм истәлекле бүләк тапшырды.

 19 октябрь көнне  Килдебәк авыл китапханәчесе мәдәният йорты хезмәткәрләре белән берлектә «Көзге байлык» дигән рәсем конкурсы үткәрделәр. Балалар көз фасылының  нинди матур булуын искә алдылар: шатлыклы, уңышка бай, яңгырлы һәм моңсу. Ләкин барыбер туган җиребез,  елның бу вакытында һәрвакыт матур, булуын әйттеләр. Шулай ук балалар көзнең билгеләре турында күп кенә кызыклы нәрсәләр белделәр, мәкальләр һәм әйтемнәр белән таныштылар. Аннары балалар кәгазь битендә көз турында рәсемнәр ясадылар.

Сәламәт тәндә – сәламәт акыл.Яшь барган саен сәламәтлеккә аеруча игътибар итәргә кирәк.Иләбәр авыл китапханәсе һәм клуб хезмәткәрләре “Ак калфак” клуб берләшмәсе әгъзалары белән берлектә “Хәрәкәттә – бәрәкәт” дигән исем астында сәламәтлек сәгате уздырдылар. “Юлдаш” газетасының “Сәламәлек” кушымтасына күзәтү ясаганнан соң, өлкәннәребез физик күнегүләр ясадылар.Соңыннан  үләннәрдән торган чәй эчеп фикер алыштылар.

Саба үзәк китапханәсе хезмәткәрләре 18 октябрь көнне Саба районының Ямьле Саба яр буенда урнашкан "Изге Кул", " Ягүр" чишмәләре янында җыештыру эшләре башкардылар. Чишмәләребез яшәү чыганагы, алар һәрвакытта саф, мул сулы, чиста булсыннар өчен һәрберебез кулдан килгәнчә үз өлешебезне кертик!

Якташыбыз татар әдәбияты белгече һәм тәнкыйтьче, филология фәннәре докторы, профессор, Татарстан Фәннәр Академиясенең мөхбир әгъзасы, ТАССРның атказанган сәнгать эшлеклесе Азат Гыйльмулла улы Әхмәдуллинга 13 октябрь көнне 90 яшь тулыр иде. Шул уңайдан, Саба район китапханәсендә “Сөембикә” клубы өчен “Якташыбыз Азат Әхмәдуллинга – 90” мәгълүмат сәгате үткәрелде. Чарада  галимнең туганы Мостафина Фәимә Исмәгыйль кызы катнашты, ул Азат Әхмәдуллинның гаиләсе турында сөйләде.

        6 августта район китапханәсенең уку залында "Өлкәннәр" клубының чираттагы утырышы булды. Хезмәт ветераннарын Өлкәннәр көне белән Саба муниципаль районы башкарма комитеты аппараты җитәкчесе Кәримов Марат Рәшит улы, ветераннар советы җитәкчесе Ильясов Фәнил Ильяс улы, Пенсия фондының Саба һәм Теләче районнары буенча рәисе урынбасары Якупова Фәридә Шәүкәт кызы, «Балкыш» халыкка социаль хезмәт күрсәтү үзәге директоры Закирова Гүзәл Рөстәм кызы, социаль яклау бүлеге җитәкчесе Гайнетдинова Лилия Нургаян кызы котларга килделәр. Алар пенсионерларны бәйрәм белән тәбрикләделәр, “Актив яшәеш” темасы буенча әңгәмә үткәрделәр, өлкәннәрне кызыксындырган сорауларга җавапларын бирделәр. Чараның икенче өлешендә кунаклар өчен чәй өстәле оештырылды, алар анда сөйләшүләрен дәвам иттеләр.