ЯҢАЛЫКЛАР

Укучыларның көзге каникулларын файдалы уздыру максатыннан мәдәният хезмәткәрләре тарафыннан төрле чаралар уздырыла.3 ноябрь көнне Эзмә урта мәктәбенең 1 сыйныф укучылары Иләбәр авыл клубы һәм  китапханәсенә экскурсиягә килделәр.Китапханә белән танышканнан соң укучылар белән берлектә “ Табигатне саклау үзебездән тора” дигән исем астында экологик сәгать узды.Чарада катнашучыларга экология темасына багышланган  китап күргәзмәсе тәкъдим ителде.Укучылар чара барышында табигатьне өйрәнү темасына кирәкле  мәгълүмат  тупладылар, табышмакларга җаваплар эзләделәр.Чарада Саба районы баш экологы Билалов Ришат Мидехәт улы катнашып, укучыларга тирә – як табигатьне саклау максаты белән, чишмә – елгаларны чистартып торырга, агачлар утыртырга кирәклеге турында аңлатты.Укучыларның сорауларына тулы җаваплар бирде, истәлекле бүләкләр тапшырды.Чара тәмамлангач укучылар клуб мөдире оештырган хәрәкәтле уеннарда катнаштылар.

2022нче ел Россиядә халык сәнгате һәм мәдәни мирасны саклау елы уңаеннан, 1нче ноябрь көнне  Саба район балалар китапханәсендә Саба гимназиясенең 2 “Д”, 3 “А” сыйныф укучыларына һәм Килдебәк урта гомумбелем бирү мәктәбенең “Кояшкай” ял лагерына йөрүче укучылары өчен “Мин кулыма китап алам” дип исемләнгән әдәби-интеллектуаль уен үткәрелде. Уен 5 өлештән: “Тел-милләт бизәге”, “Тапкырларга табышмак” , “Төрле милләт киемнәрен таныйсыңмы”,  “Татар халкының милли уеннары” һәм “Серле сандык” тан торды. Укучылар сынатмадылар, актив җавап биреп үз белемнәрен, осталыкларын күрсәттеләр. Чарада барлыгы 56 укучы катнашты.

1 нче ноябрь көнне Тимершык  авыл китапханәсендә мәдәният хезмәткәрләре белән берлектә  "Экология һәм без " дигән темага экологик сәгать үткәрелде. Чараны китапханә мөдире  башлап җибәреп, балаларны  авылыбызның  чишмәләре , аларның сакланышы,тарихы белән таныштырды. Шулай ук , чарада Татарстан Республикасы экология һәм табигать ресурслары министрлыгының өлкән белгече Билалов Ришат Мидехәт улы катнашты. Ришат Мидехәт улы балаларны "экология" төшенчәсе белән таныштырды. Әйләнә - тирә мөһитне, сулыкларны саклауда балаларның ничек өлеш кертә алуы турында сөйләде. Балалар экология кагыйдәләре белән танышып, кешенең табигатьтән, һавадан, судан башка яши алмавын, шуңа күрә аларга карата сакчыл булырга кирәклеген аңладылар. Су белән    кызыклы  тәҗрибәләр уздыру балаларга  ошады. Чара ахырында Билалов Р.М. балаларга истәлекле бүләкләр тапшырды.

Укучыларның көтеп алган көзге каникуллары башланып китте. Район балалар китапханәсе үзәк китапханә белән берлектә Саба гимназиясенең, Саба урта гомум белем бирү мәктәбенең, сәләтле балалар мәктәп интернатның ​ 1 сыйныф укучылары өчен "Китап иленә сәяхәт" дип исемләнгән квест-уен үткәрделәр. Иң беренче укучылар экраннан видео карап, квест-уенның төп максатын белделәр.Убыр белән Шүрәле урлаган әкият геройларын коткарыр өчен укучыларга тукталышларда тукталып, төрле биремнәрне үтәргә туры килде, мәсәлән: әкияттән алынган рәсемнәрне танып Дюймовочканы коткардылар, сорауларга җавап биреп тиенне, әкияти пазллар төзеп Буратиноны, ә инде Куян кызын коткарыр өчен өстәлгә куелган предметларның кайсы әкиятләргә туры килгәнен белергә кирәк иде. Укучылар сынатмадылар, үз осталыкларын, белемнәрен күрсәтеп биремнәрне бик тиз генә үтәделәр. Барлык әкият геройларын табып Әкиятчегә кайтардылар. Чара ахырында балаларга​ төрле тәҗрибәләр күрсәтелде. Барлыгы 82 укучы катнашты.

Табигать - ул безнең уртак йортыбыз. Ул гүзәл һәм чиста булсын өчен һәр кеше үзеннән өлеш кертергә, аны сакларга һәм яратырга тиеш. Кечкенәдән үк шуны аңлап үскән, табигать матурлыгын күрә, соклана белгән бала шәфкатьле, кешелекле булып үсә. Саба районы  Сатыш урта мәктәбе укучылары бүген бик кызыклы экологик дәрестә булдылар. Дәресне аларга укытучы апалары түгел, ә Татарстан Республикасы экология һәм табигать ресурслары министрлыгының өлкән белгече Билалов Ришат абыйлары уздырды. Балалар табигатьне- сулыкларны, җирне, һаваны ничек сакларга кирәклеген кызыксынып тыңладылар, бик күп сорауларга җавап таптылар.

Көз көне кызлар, хатын-кызлар, хәтта кызлар һәм өлкәннәр дә кич утыру өчен җыела. Кайчагында кызлар утырган урыннарга егетләр килә, ул чакта күңелле бию, уеннар башлана. Бүген элекке заманнарда ничек  кичке утырмаларга җыелганнары хакында  сүз алып барабыз. Элек тә  кич  утырулар октябрь ахырында, ноябрь башында, барлык кыр эшләре тәмамлангач башлана торган була. "Ак калфак" клуб берләшмәсе һәвәскәрләре  кич утыру өчен китапханәгә җыйналдык. Максатыбыз: мобилизацияләнгән райондашларыбызга,авылдашларыбызга ярдәм итү.

18 октябрь көнне «Умырзая” балалар бакчасына йөрүче балалар Иләбәр авыл китапханәсенә экскурсиягә килделәр. Экскурсиянең максаты мәктәпкәчә яшьтән үк аларны китап белән кызыксындыру, китапка сакчыл караш тәрбияләү.Китапханә һәм китап фонды, журналлар белән танышканнан соң балалар өчен “Әкиятләр дөньясында” дигән исем астында тематик сәгать уздырылды.Китап күргәзмәсенә куелган китаплардагы әкиятләрне тыңлаганнан соң балалар сорауларга җаваплар бирделәр, биремнәрне үтәделәр.

30 сентябрьдә Саба район китапханәсенең уку залында «Мишә дулкыннары» язучылар клубының актив әгъзасы Мөхәммәдиева Розалия Әүхәди кызының 65 яшьлек юбилее үткәрелде. Кичәгә Саба муниципаль районының мәдәният бүлеге начальнигы Заһидуллин Рөстәм Фидаил улы, «Саба дулыкыннары» телерадиокомпаниясе җитәкчесе Әлфия Мөбәрәкова, ветераннар советы җитәкчесе Ильясов Фәнил Ильяс улы килделәр. "Мишә дулкыннары"клубларының актив әгъзаларына да сүз бирелде. Алар, үз чиратларында юбилярны шигырь юллары белән котладылар. Айнур Гәрәев җыр башкарды, баянда Айнур Габделхаков уйнады. Кичәне алып баручы китапханәчеләр дә юбилярга җылы теләкләрен җиткерделәр. Чара ахырында үзәкләштерелгән китапханә системасы директоры Билалова Ләйсән Рәкыйп кызы коллектив исеменнән Рәхмәт хаты һәм истәлекле бүләк тапшырды.

14нче сентябрь көнне Саба район балалар китапханәсендә, “Укучының мәдәни көндәлеге” тапшыру проекты кысаларында, Саба гимназиясенең 1 “В” сыйныф укучылары өчен  (сыйныф җитәкчеләре Әүбакирова А.Р.) «Мәдәни дөнья» дип исемләнгән чара үткәрелде. Китапханәче Шакирҗанова И. укучыларга “Укучының мәдәни көндәлеге”н ничек эшләп бару кагыйдәләре турында сөйләде һәм әти-әниләре белән бергә “Укучының мәдәни көндәлеге”  сайтына теркәлеп, конкурсларда катнашырга киңәш итте. Ә чараның икенче өлешендә Татарстан Республикасы территориясендә яшәүче халыкларның милли костюмнарын искә төшерделәр һәм камзол, бизәкле читек һәм түбәтәй, калфак сурәтләнгән пазллар җыйдылар. Чара ахырында барлык укучыларга “Укучының мәдәни көндәлеге” тапшырылды.

26 август көнне Саба районында Дөньякүләм Әдәби Сабан туе үтте. Сабантуйга Татарстаннан, Россиянең башка төбәкләреннән, чит җирләрдән кунаклар килгән иде. Шулай ук язучыларыбыз, шагыйрьләребез  бәйрәмнең мөхтәрәм кунаклары булдылар.

Бәйрәм Саба районы мәдәният бүлеге хезмәткәрләре һәм​ иҗади коллективлар чыгышы белән башланып китте.  Чыгыш ясаган һәркем Дөньякүләм Әдәби марафонның телебезне саклаудагы әһәмиятен билгеләп үтте. Әдәби Сабантуеның​ флагын күтәрү өчен мәйданга районыбыздан иң беренчеләрдән булып Әдәби марафонда катнашкан якташ язучыбыз, ”Бәллүр каләм”бүләге иясе, Татарстанның атказанган мәдәният хезмәткәре, Татарстан журналистлары берлеге әгъзасы Гөлсинә Галимуллина,​ Әдәби марафонда иң күп китап укучы катнаштырган Килдебәк авылы китапханәчесе Ракипова Ләйсән һәм иң күп китап укучы Галимҗанова Алия чакырылды. Сабантуйда Әдәби аланның​ “Җәйге китапханә” өлешенә йомгак ясалды һәм җиңүче балалар мәйдан түренә чакырылды. Әдәби сабантуеның иң мөхтәрәм кунаклары – меңеллык татар әдәбиятының лаеклы дәвамчылары – хөрмәтле язучыларыбыз, шагыйрьләр, килгән кунаклар белән җитәкләшеп, китап укучы яшь буынның иң зур хыялын тормышка ашырып, Саба сабантуе мәйданыннан​ бергәләп уздылар.  Әдәби марафон проектында иң актив районнарның китап укучылары да Әдәби Сабантуе сәхнәсенә күтәрелде. Өченче урынны 64 китап укучысы катнашкан Әлмәт шәһәре алды. Икенче​ урынны Арча районы яулады. Быел әдәби марафонда Арча районыннан 77​ китап укучы финалга чыккан. Беренчелекне 316 кеше катнаштырып, Саба районы  алды, инде ундүртенче марафон рәттән " Иң күп татарча китап укучы район" булып танылды, кубокка ия булды. Алар сабантуй мәйданыннан чын җиңүчеләр булып уздылар. Сабантуе милли уеннар белән дәвам итеп “Әдәби көрәш” белән тәмамланды.