ЯҢАЛЫКЛАР

   5 июльдә Саба районы Татарстан Республикасы Финанс министрлыгы һәм Татарстан Республикасы Финанс министрлыгының Казначылык Департаменты хезмәткәрләрен каршы алды.

Финанс-бюджет палатасы җитәкчесе Шәмсун Әкбәр улы Сөнгатовны туган көне белән чын куңелдән тәбрик итәбез. Сәламәтлек, гаилә иминлеге, җаваплы хезмәтендә көч һәм сабырлык телибез. Гаилә тигезлегендә  яшәп, балалар-оныклар игелеге күрергә язсын, киләсе еллар да күңелле вакыйгаларга, истәлекле мизгелләргә мул булсын.

Июнь аеның матур көннәрендә спорт сөючеләр кызыксынып пляж футболы буенча уеннарны күзәтте. 9 команда арасында Сатыш авыл җирлеге  командасы да бар иде. Әлеге команда составында Финанс-бюджет палатасы егетләре Инзил Мостафин һәм Илнар Галиев та уйнады. Нәтиҗәдә, команда уен нәтиҗәләре буенча 3 урынны яулады. Шунысы куанычлы, егет-кызларыбыз һәр спорт һәм мәдәни чараларда актив катнашалар, кирәк чакта башка командалар составында да үзләренең көчләрен сынарга өлгерәләр.

Финанс-бюджет палатасы яшьләре "Олимп" стадионында узган Яшьләр көнендә актив катнашты һәм берничә төр ярышларда призлы урыннар алуга да ирештеләр. Кул көрәшендә Айзилә Халикова 2 урынга лаек булды. Городки дип исемләнгән ярышларда барлык кызлар да катнашып карады, ә уңыш Макаева Алсу белән  Саматова Гөлиягә елмайды: алар 1 нче һәм 2нче урыннарны яуладылар. Аркан тартыш ярышында безнең кызлар командасы 4 урын алды. Шулай ук хатын-кызлар арасында көч экстримы буенча да ярышлар үткәрелде. Халикова Айзилә белән Макаева Алсу анда да үзләрен сынап карадылар.  

Бүген Финанс - бюджет палатасының баш белгече Рузалия Мулланур кызы Дәүләтшинаны 40 яшь тулган көне белән тәбрикләп, иң матур теләкләр яңгырады. Әлеге тәбрикләмәгә кушып, шулай ук аның  биредә 2005 елдан бирле нәтиҗәле хезмәт куюы һәм эшен җиренә җиткереп, төгәл башкаруы да билгеләп үтелде.

2025 елның икенче яртыеллыгына газета – журналларга язылу башланды. Финанс–бюджет палатасы хезмәткәрләре һәр елны район газетасына бик теләп язылалар, һәрдаим газета аша районда булган яңалыклар белән танышып торалар, редакциябездә хезмәт куючы журналистларның һәр язмасын кызыксынып укып баралар. Быел да искәрмә булмады, финансистларның күбесе “Саба таңнары” район газетасына язылып куйды.  

Милли көрәш – Сабан туйларның күрке һәм җаны. Бәйрәмгә җыелган халык, аеруча көрәш яратучылар, батырларның бил алышканын түземсезлек белән көтеп ала. Үзәкләштерелгән бухгалтерияда хезмәт куючы бухгалтер егетебез Илфар Габдрахманов та район Сабантуенда бил алышып, 65 кг. ир-егетләр арасында 3 урынга лаек булды. Җиңүе белән котлыйбыз Илфар Радик улын!
Ә көрәш алдыннан бераз тәнен язып, ул әтәч тоту уенында да катнашып алды һәм әтәчле дә булды.

Район Сабантуенда Финанс-бюджет палатасы бәйрәмнең традицион уенын - «Катыктан акча эзләү» уенын үткәрде. Быел да әлеге уен популярлыгын югалтмыйча, уенда 104 кеше катнашты. Иң башта уен катыктан акчаны таяк белән эзләүдән башланып китте. Уенның әлеге өлеше, хатын-кызлар һәм ир-егетләр категориясенә бүленмичә бәяләнеп, 1,2,3 урын алучылар бүләк Сертификатларына ия булдылар. Алга таба уен борынгыдан сакланып калган гадәт – акчаны катыктан баш белән чумып эзләү белән дәвам итте. Җиңүчеләр ике категориягә – ир-егетләр һәм хатын-кызлар категориясенә бүленеп, тәбрикләнде.
Быел илебездә Ватанны саклаучылар елы икәнен дә оештыручылар истә тотып, хәрби хезмәттә булган ир - егетләр арасында да шулай ук 1,2,3 урыннар билгеләнде һәм җиңүчеләр Сертификатлар белән бүләкләнде. Катнашучыларның берсе дә бүләксез китмәде, барысын да уенда катнашкан өчен кызыксындыру бүләкләре көтә иде.

Саба аграр көллиятендә “Икътисад һәм бухгалтерлык исәбе” буенча узган  демонстрацион имтиханнарда Финанс – бюджет палатасы белгече Рамил Шакиров баш эксперт буларак катнашты. Студентлар теоретик белемнәрен генә түгел, ә практик күнекмәләр дә тәкъдим иттеләр. 1С программасында оешма булдырып, аның турындагы барлык мәгълүматны туплап, программага керттеләр, бухгалтерлык проводкаларны дөрес үткәрү, милекнең исәпкә алынуы, исәп мәгълүматлары белән мөлкәтнең фактка туры килүе, хезмәт хакы исәпләү – болар барысы да демонстрацион имтиханнарда башкарылды. Ахырдан исә студентлар тарфыннан имтихандагы эшчәнлекләренә үзанализ ясалды.

Үзәкләштерелгән бухгалтериянең баш бухгалтеры Алсу Нуриман кызы Мингараеваны 50 яшьлек юбилее белән тәбрик итәбез. Аңа ныклы сәламәтлек, гаилә тигезлеге, тормышында һәм хезмәтендә уңышлар юлдаш булуын теләп калабыз.

Алсу Нуриман кызы Үзәкләштерелгән бухгалтерияда 2007 елдан бирле хезмәт куя, баш бухгалтер вазыйфасында 2013 елдан бирле.