Баланың баш мие сәламәтлеге: белгеч ярдәме кайчан кирәк?
Ата – ана интуициясе һәм игътибары-баланың баш мие сәламәтлеге белән проблеманы вакытында күрергә һәм ярдәм күрсәтергә ярдәм итә торган иң көчле инструментлар. Нинди очракларда табибка мөрәҗәгать итәргә кирәк? Республика балалар клиник хастаханәсе белгечләре сөйли.
Яшькә карап белгечләрнең игътибарын таләп итә торган төп сигналлар:
Кечкенә вакытта (3 яшькә кадәр) хәрәкәт күнекмәләрен үзләштерүдә сизелерлек тоткарлык (бала башын тотмый, борылмый һ.б.), якыннарының тавышларына яки йөзләренә реакция булмау, имезүнең бозылуы, даими сүлпәнлек яки, киресенчә, артык ярсучанлык һәм еш кычкырулар сагайтырга тиеш.
Мәктәпкәчә яшьтәге һәм 3-12 яшьлек балаларда сөйләм үсешен, биремнәргә игътибарны туплау һәм мәгълүматны үзләштерү сәләтен күзәтү мөһим. Консультация өчен сәбәп яшьтәшләр белән аралашудагы кыенлыклар, көчле борчылу, фобияләр, еш баш авыртулары, йокы белән проблемалар, Төнге куркыныч төшләр яки сәбәпсез агрессия яки йомыклык кебек үз-үзеңне тотыштагы кискен үзгәрешләр булачак.
Яшүсмерлек яше (12-18 яшь) – тирән үзгәрешләр чоры, әмма сагайтырга тиеш: өлгерешнең кискен кимүе, хобби белән кызыксынуның тулысынча югалуы, апатия, хроник арыганлык, конфликтлар, гаиләдән һәм дуслардан изоляция. Аеруча игътибар – кәеф үзгәрүгә һәм үз-үзенә зыян китерү турындагы фикерләргә. Мондый очракларда ярдәм кичекмәстән кирәк.
Нәрсәдән башларга? Беренче звено һәрвакыт педиатр була. Ул беренчел тикшерү үткәрәчәк һәм кирәк булганда тар белгечләргә: неврологка (нерв системасын диагностикалау), психиатрга (эмоциональ халәтләрне коррекцияләү), нейропсихологка (когнитив функцияләр белән эшләү), логопедка яки башка табибларга юнәлтәчәк.
Исегездә тотыгыз: белгечкә вакытында мөрәҗәгать итү-киләчәк турында кайгырту ул. Авырлыкларның сәбәпләрен аңлап, без балага аның потенциалын ачарга, авырлыкларны җиңәргә һәм психик сәламәтлеген сакларга ярдәм итәбез.