"Милләт яме - йола бәйрәмнәрдә!" дип аталган фестиваль-конкурс
Рухи кыйммәтләрне саклау, ныгыту, милли традицияләрне торгызу мөһимлеген исәпкә алып, 2023 ел Татарстанда милли мәдәниятләр һәм гореф-гадәтләр елы дип игълан ителде. Шул уңайдан район башлыгы Рәис Нургали улы Миңнеханов Саба муниципаль районы учреждениеләре һәм авыл җирлекләре арасында "Милләт яме - йола бәйрәмнәрдә!" дип аталган фестиваль-конкурс игълан итте.
7 октябрь көнне Килдебәк мәдәният йортында әлеге фестиваль-конкурс узды. Кече Шыңар мәдәният йорты, Оет авыл клубы хезмәткәрләре һәм үзэшчәннәре “Кияү мунчасы” йоласын, Олы Нырты мәдәният йорты, Язлы Арташ авыл клубы хезмәткәрләре һәм үзэшчәннәре "Солдат озату", ә Иштуган мәдәният йорты хезмәткәрләре һәм үзэшчәннәре “Удмуртча туй йоласын” тәкъдим иттеләр.
Мондый традицияләр бер-беребезгә карата ихтирамлы һәм игелекле булырга, туган телгә, милләткә мәхәббәт тәрбияләргә кирәклеген искә төшерә.
Тамашачылар фестивальдә катнашучыларны бик җылы сәламләделәр, аларга көчле алкышлар белән рәхмәт әйттеләр.