Язгы каникул көнендә укучылар Саба ГХАТ бүлегендә булды
28 март көнне Саба муниципаль районы Башкарма комитетының ЗАГС бүлегенә Юлбат төп мәктәбенең 8 сыйныф укучылары экскурсиягә килде.
Биредә алар өчен файдалы мәгълүматларга, тормыштан китерелгән мисалларга, архив материалларына бай булган очрашу уздырылды. Балаларга оешмада теркәлә торган гражданлык хокукый актлары, архивның ничек формалашуы, никахны теркәү өчен нинди шартлар үтәлергә тиешлеге, фамилиясен, исемен яки әтисенең исемен үзгәртү өчен ниләр кирәклеген, атаны билгеләү һәм уллыка (кызлыкка) алуның нәрсә икәнлеге, алар арасында нинди аерма булуы турында тулы аңлатма бирелде.
Укучылар шулай ук ЗАГС бүлеге белән бер бинада эшләүче “Минем документлар” Дәүләт хезмәтләре үзәге, Россия Эчке эшләр министрлыгының Саба районы буенча бүлегенең “Миграция мәсьәләләре бүлеге” һәм “ЮХИДИ бүлеге” эшчәнлеге белән дә таныштылар.