Байлар Сабасында 2023нче ел өчен үзара салым акчасын җыю эше башланды
Бу көннәрдә Байлар Сабасы бистәсендә биредә яшәү урыны буенча теркәлгән гражданнардан 2023нче ел өчен үзара салым акчасын җыю эше башланып китте. Аның күләме һәр кеше башына 500 сумны тәшкил итә. Акчаны Байлар Сабасы бистәсе, Школьная урамы, 31А йорт адресы буенча Саба шәһәр җирлеге җирле үзидарә органнары урнашкан бинага килеп түләргә мөмкин. Бистәдә эшчәнлек алып баручы оешма, учреждение, предприятиеләр белән килешү нигезендә, акча җыюны эш урынына барып та оештырырга мөмкин. Беренчеләрдән булып әлеге эшне “Алмаз-мебель” компаниясе җитәкчелеге оештырды. Йорт җиһазлары җитештерү буенча районда гына түгел, республикада үз урынын тапкан компаниядә хезмәт куючылар яхшы хезмәт хакы алып эшли, айлык эш нәтиҗәләре буенча төрле кызыксындыру чаралары да каралган. “Бөтен башкарылган эшләр күз алдында, чын күңелдән рәхмәт әйтеп, үзебез өчен дип түлибез”, - диләр эшчеләр. Башкаларның да “Алмаз-мебель” компаниясе үрнәгенә кушылып, җирле әһәмиткә ия мәсьәләләрне хәл итүдә үз өлешләрен вакытында (2022нче елның 1нче декабренә кадәр) үтәрләр дигән ышанычта калабыз.