“Бүре һәм кәҗә бәтиләре” әкияте геройлары юл йөрү кагыйдәләрен өйрәнә
16 март көнне Шәмәрдәннең 1нче «Әкият» балалар бакчасында балаларны юлда йөрү куркынычсызлыгы кагыйдәләренә өйрәтүгә багышланган чара булып үтте. Зурлар төркеме балалары “Бүре һәм кәҗә бәтиләре” дип исемләнгән театраль тамаша күрсәттеләр. Балалар шушы спектакль аша, юлда йөрү куркынычсызлыгы кагыйдәләрен ничек үзләштергәннәрен күрсәттеләр.Әкият балаларга да, кунакларга бик ошады. Балалар юлларда игътибарлы булырга, кагыйдәләрне үтәргә сүз бирделәр. Чакырылган кунаклар, ЮХИДИ инспекторы Насибуллин Ильнур Дамир улы һәм “Юл хәрәкәте иминлеге” дәүләт бюджет оешмасының Саба бүлеге җитәкчесе Ягафарова Гүзәл Назиф кызы педагогларның эшен югары бәяләделәр, балаларның белемнәреннән канәгатъ калдылар, үзләренең киңәшләрен бирделәр, истәлекле бүләкләр тапшырдылар.