ЯҢАЛЫКЛАР

20 нче март көнне Олы Кибәче авылында Нәүрүз бәйрәме билгеләп үтелде. Бәйрәмдә төрле милли һәм спорт уеннары уйналды, җырлар, биюләр булды, бәйрәмгә килгән халык мичтә пешкән коймак һәм үзбәк пылауы белән сыйланды.

13 март көнне Олы Кибәче урта мәктәбендә "Болгар" радиосының яңалыклар хезмәте мөхәррире, "Хәтер китабы", "Эчәр суым синдә, Кибәчем!" китаплары авторы, Татарстан журналистларының "Бәллүр каләм" бүләге иясе, филология фәннәре кандидаты, авылдашыбыз Люция Шәрәфиева белән "Бер очрашу-бер гомер" дип исемләнгән очрашу кичәсе узды. Кунагыбыз үзенең балачагы, студент еллары, иҗаты турында сөйләде. Кичә концерт номерлары белән үрелеп барды. Очрашу эчтәлекле һәм истә калырлык булды. 

Олы Кибәче авыл клубында Халыкара хатын-кызлар бәйрәме уңаеннан, "Ягез әле, кызлар!" бәйгесе уздырылды. Хатын-кызлар интеллектуаль, спорт һәм иҗади биремнәр үтәп көч сынаштылар. Чара бик күңелле үтте.

Төбәк авыл клубында Халыкара хатын-кызлар көненә багышлап "Вәт ичмаса киленнәр!" бәйгесе уздырылды. Чарада Төбәк авылының 4 килене катнашты. Алар төрле конкурсларда көч сынаштылар. 

5 март көнне Олы Кибәче авыл җирлегендә Халыкара хатын-кызлар көне уңаеннан, авыл җирлеге кубогына, хатын-кыз командалары арасында волейбол ярышы булды. Ярышта барлыгы 5 команда катнашты. Кубокка Кече Кибәче кызлары командасы ия булды.

"Сугышның йөзе хатын-кызныкы түгел" дигән социаль-гуманитар проект кысаларында уздырылучы чаралар һәм ТР Дәүләт Советының хатын-кыз депутатларыннан торучы "Мәрхәмәт-Милосердие" берләшмәсенең беркетмәсен үтәү максатыннан, Олы Кибәче авыл җирлегендә хатын-кыз тыл ветераннары 8 март бәйрәме белән тәбрикләнде. Бүләк пакетларга иганәче "Саба" ҖЧҖ Кибәче бригадасы булды. Бүләкләрне авыл җирлеге башлыгы А.К. Сафин өләште.

80/20 программасы буенча төзелүче йортта эчке төзү һәм матурлау эшләре бара. 

Олы Кибәче урта мәктәбе остаханәсендә капиталь ремонт бара. Түбәсен алыштыру эше төгәлләнеп килә, шуның белән беррәттән эчке ремонт эшләре дә башкарыла.

Олы Кибәче авыл җирлегендә "Ватанны саклаучылар көне" уңаеннан авыл җирлеге күчмә кубогына мини-футбол ярышы булды. Ярышта барлыгы 6 команда катнашты. Күчмә кубокка Кече Кибәче-2 командасы лаек булды.

Олы Кибәче авыл җирлегендә "Әфганчылар көне" һәм "Ватанны саклаучылар көне" уңаеннан авыл җирлеге кубогына волейбол ярышлары булды. Уеннарда 5 команда көч сынашты. Олы Кибәче авылы командасы кубок иясе булды.