ЯҢАЛЫКЛАР
Олы Кибәче авыл җирлегеннән бер төркем хатын-кызлар мобилизацияләнгәннәргә гуманитар ярдәм әзерләделәр. Алар хәрби операция өчен маскировка сеткасы ясадылар.
Олы Кибәче авыл җирлеге командасы Лесхозда узган чаңгы ярышында катнашты. Авыл җирлеге башлыгы А.К. Сафин 50 яшьтән югары җитәкчеләр арасында 3 нче урын яулады.
Олы Кибәче авылы мәчетендә балалар арасында азан әйтү бәйгесе оештырылды. Бәйгене "Болгар" радиосының яңалыклар хезмәте мөхәррире, Олы Кибәче авылыннан чыккан журналист Люция Шәрәфиева оештырды. Бәйге Олы Кибәчедә мәчет төзелүнең 30 еллыгына багышлап һәм Люциянең әтисе, күп еллар имам ярдәмчесе булып торган Рафаэль абый истәлегенә оештырылды. Бәйгедә барлыгы 11 бала катнашты. Җиңүче булып Әмир Мөхәммәтҗанов танылды. Катнашучыларга акчалата премияләр һәм күчтәнәчләр бирелде.
Ватанны саклаучылар көне уңаеннан Олы Кибәче авыл җирлегендә, авыл җирлеге кубогына, ир-егетләр командалары арасында мини-футбол ярышы оештырылды. Ярышта барлыгы 4 команда катнашты. Кубокка Кече Кибәче егетләре командасы ия булды. Калган командалар да авыл җирлегенең Дипломнары һәм акчалата премияләр белән бүләкләнделәр.
Саба муниципаль районы башлыгы исеменнән мобилизацияләнгән егетләрнең гаиләләренә Ватанны саклаучылар көне уңаеннан, авыл җирлеге башлыгы А.К. Сафин пакетлар тапшырды.
Олы Кибәче урта мәктәбе укучылары "Солдатка хат" акциясендә катнаштылар һәм Украинада махсус хәрби операциядә катнашучы егетләргә хатлар яздылар. Солдатларга исәнлек, саулык, уңышлар һәм тизрәк җиңеп өйләренә кайтуларын теләделәр.
Олы Кибәче авыл җирелегендә Әфганчылар көненә карата, авыл җирлеге кубогына, ир-егетләр командалары арасында волейбол турниры булып узды. Турнирда барлыгы 4 команда катнашты. Кубокка Кече Кибәче егетләре командасы ия булды. Уенда җиңүче командалар авыл җирлеге башлыгының дипломы белән бүләкләнделәр. Барлык уенчаларга да акчалата премияләр бирелде. Партияләр арасында концерт номерлары да булды.
Кече Кибәче авыл китапханәсендә "Ак калфак" хатын-кызлар берләшмәсенә йөрүчеләр Украинада махсус хәрби операциядә катнашучы егетләргә сетка әзерләү белән шөгыльләнәләр.
Олы Кибәче авыл җирлегендә "Россия чаңгы юллары-2023", "Татарстан чаңгы юллары-2023" акциясе кысаларында массакүләм чаңгы ярышы булып узды. Ярышта мәктәпкәчә яшьтәгеләр, укучылар, җирлек территориясендәге бюджет оешмалары эшчеләре катнашты. Призлы урын алучылар авыл җирлегенең Дипломнары һәм бүләкләр белән тәбрикләнде.
7 февраль көнне Төбәк авыл клубында "Саба" ҖЧҖ Кибәче бригадасының 2022 елгы эшчәнлеге буенча отчет җыелышы булды. Төрле тармак белгечләре үз эшчәнлекләре буенча хисап тоттылар. Юбилярларга Авыл хуҗалыгы идарәсенең һәм Саба муниципаль районы башлыгының мактау грамоталары тапшырылды.