ЯҢАЛЫКЛАР
22 август көнне район китапханәсе балалар китапханәсе белән берлектә «Без Россия флагы астында бергә» акциясе үткәрде. Акция барышында безнең бистәдә яшәүчеләр безнең флагның төсләре, символлары белән таныштылар, викторина сорауларына җавап бирделәр. Акциядә катнашучылар үз иленең бер өлеше-триколор тасмасына ия булдылар.
Саба район китапханәсендә “Өлкәннәр” клубы өчен “Яңа гасыр тавышы: Антология” китабына презентация үткәрелде. Антологиягә XXI гасыр башында татар әдәбиятына килгән шагыйрь, язучы, драматургларның тормыш юлы, иҗатлары турында язмалар, шулай ук шигырьләре, хикәяләре, пьесалары туплап бирелгән. “Яшь язучыларыбыз иҗаты” китап күргәзмәсенә күзәтү үткәрелде, шигырьләр, хикәяләрдән өзекләр укылды.
Кече Шыңар мәдәният йорты һәм китапханә хезмәткәрләре "Ак калфак" хатын-кызлар клубы әгъзалары һәм авылдашлары өчен борынгы Болгар шәһәренә экскурсия оештырдылар. Экскурсовод борынгы дәүләт тарихы белән таныштырды, музейларда һәм истәлекле урыннарда булды, борынгы руиннар, тынгысыз, әмма үткәннең объектив шаһитлары белән очрашты. Биредә бүгенге көнгә кадәр тарих үзе яши. Барысы да сәфәрдән канәгать калдылар, рәхмәт сүзләре белән таралыштылар.
Юлбат мәдәният йорты һәм китапханә мөдирләре «Игелекле борынгы васыятьләр» дип исемләнгән фольклор сәгате үткәрделәр, анда балаларга фольклор,ата-бабаларыбызның көнкүреше, гореф-гадәтләре, татар мәдәниятенең үзенчәлеге , туган телне белү һәм яратырга кирәклеге турында сөйләделәр. Халык мәдәнияте-балаларның әхлакый, танып-белү һәм эстетик үсеше чараларының берсе. Мәдәният йорты һәм китапханә мөдирләре татар халкының бик бай мәдәнияте булуы турында сөйләделәр. Традицияләр һәм халык фольклоры ярдәмендә бик мөһим нәрсә: чорлар бәйләнеше, үткәнне олылау һәм хөрмәт итү, аның казанышлары белән тулылана. «Халкыбызның күңел җәүһәрләре»дип исемләнгән тематик күргәзмә оештырылды. Балалар һәр экспонат һәм аларның тарихы белән таныштылар.
Явлаштау авыл китапханәсендә әдип Р.Мингалимнең туган көне уңаеннан "Дуслык көче" дип исемләнгән әдәби сәгать үткәрелде.Балалар шагыйрьнең тормыш юлы, иҗаты белән таныштылар, шигырьләрен кычкырып укылдылар."Кызык рәсем"шигыре буенча рәсем ясадылар, "Хаталы шигырь"нең хаталарын төзәттеләр.Өйдә укырга китаплар алдылар.
16 август көнне Район китапханәсе балалар китапханәсе белән берлектә татар
композиторы Рөстәм Яхин һәм балалар язучысы Мансур Сафин иҗатына багышланган
китап күргәзмәсенә күзәтү үткәрделәр.
Район китапханәсе балалар китапханәсе белән берлектә "Гаилә белән китапханәгә" проекты кысаларында "Витаминнарның җәйге муллыгы" дигән чара үткәрделәр, ата-аналар белән очрашу барышында балалар "Файдалы һәм зарарлы" дип исемләнгән уен уйнадылар. "Җиләк-җимешләр"дип исемләнгән китап күргәзмәсенә күзәтү үткәрелде. Чара ахырында барлык катнашучыларны да туңдырма белән сыйладылар, аны кунаклар үзләре җәйге файдалы витаминнар белән бизәделәр
26 июль көнне Саба Үзәк китапханәсе балалар китапханәсе белән берлектә мәчет каршында эшләп килүче җәйге лагерь балалары өчен “Җәйге китапханә-2022” дип исемләнгән бәйрәм оештырды. Бәйрәмдә Убырлы,Шүрәле, Буратино һәм Зур китап кунак булдылар. Алар балаларга әкияти тамаша күрсәттеләр, шулай ук балалар белән бергәләп сорауларга җаваплар эзләделәр.
Һәр елны 22 июнь көнне китапханәчеләр үсеп килүче буынны сугыш башланган көн белән таныштыралар. Район китапханәсе балалар китапханәсе белән берлектә “Халык хәтере мәңгелек” дигән хәтер көне үткәрделәр. Саба үзәкләштерелгән китапханәләр системасы директоры Ләйсән Рәкыйп кызы Билалова китап укучылар игътибарына сугыш елларының фото карточкаларын тәкъдим итеп күзәтү ясады һәм сугыш чорын сөйләп узды. Чара Аяз Гыйләҗевның “Язгы кәрваннар” әсәреннән тере күргәзмә белән дәвам итте. Шулай ук укучыларга “Блокада ипие” турында сөйләп уздылар һәм аларга ипидән авыз итәргә тәкъдим ителде. Чарабызның төп кунагы сугыш чоры баласы Рәкыйбә Кәшит кызы Гатауллина булды. Рәкыйбә апа, укучыларга сугыш чорының авыр заманаларында урманын да кискәнен, субаен да какканын, Мәскәү янында торф та чыгарганын сөйләп узды.Чара ахырында Рәкыйбә апа барлык катнашучыларга изге теләкләрен теләп калды.
Саба районы мәдәният бүлеге, Әбрар Кәримуллин исемендәге район үзәк китапханәсе, “Ак калфак” Бөтендөнья татар хатын-кызлары оешмасының Саба районы бүлекчәсе белән берлектә Россиядә халык сәнгате һәм матди булмаган мәдәни мирас елына багышланган “Ак яулыгым - күңел сафлыгым” бәйгесе оештырды. Саба районының төрле авылларда чигү осталары тарафыннан мастер-класслар үткәрелде, 50 артык яулык чигелде. Бүген Саба Сабантуенда җиңүчеләр бүләкләнде. Яулык чигү буенча өйрәтү дәресләре уздырылды. Балалар курчаклары өчен яулык чиктеләр, өлкәннәр чигүнең төрле алымнарын өйрәнделәр.