ЯҢАЛЫКЛАР

5 март көнне Саба район китапханәсендә, якынлашып килүче 8 март бәйрәме уңаеннан, китапханә каршында эшләп килүче  "Мишә дулкыннары", "Сөембикә", "Алтын куллар" клублары өчен очрашу оештырылды. Алар өчен ҮКС директоры Билалова Ляйсан Рәкыйп кызы яңартылган китапханә буйлап экскурсия үткәрде. Чараның икенче өлешендә Саба мөхтәсибәтенең яшьләр бүлеге җитәкчесе Галимҗанов Алмаз Хәйдәр улы белән очрашу булды. Хәзрәт барлык хатын-кызларны бәйрәм белән котлады, хатын-кызларның җәмгыятьтә, гаиләдә зур роле, гаилә кыйммәтләре турында сөйләде. Очрашу һәркемнең күңеленә хуш килде.

3 мартта Саба район китапханәсендә ротангадан кашпо үрү буенча мастер-класс үткәрелде. Мастер-класста 7 кеше катнашты.

2 март көнне Балтач районында III Төбәкара "Талантлар парады" балалар иҗат фестиваль-конкурсы узды.

Конкурс нәтиҗәләре: Мөхәммәтгалиева Азалия - III дәрәҗә дипломант.

 Рахматуллина Мәликә - III дәрәҗә дипломант.

 Габтрахманова Самира - II дәрәҗә дипломант.

 Абсәлихова Зилия - I дәрәҗә дипломант.

 Павлова Ксения - III дәрәҗә лауреат.

Давыдова Эвелина - III дәрәҗә лауреат.

 Сәлимова Сафия - III дәрәҗә лауреат.

 Садыйкова Мәрьям-  II дәрәҗә лауреат.

 “Экспромт” хореография коллективының “Сплетение” төркеме -  II дәрәҗә лауреат. Давыдова А. М. - I дәрәҗә лауреат.

 “Экспромт” хореография коллективы - I дәрәҗә лауреат.

Укучыларыбызны котлыйбыз һәм алга таба да җиңүләр телибез!

«Бер очрашу – үзе бер гомер» -  очрашу, кичә.
1 март - язның беренче көнендә, Саба район китапханәсе лаеклы ялда булган ветеран китапханәчеләрне үзенә җыйды. Чараны реконструкциядан соң яңартылган яңа бина буенча экскурсиядән башладык.Үзгәрешләр, китапханә эшчәнлегенә күзәтү ясап, элек эшләгән эш урыннарын исләренә төшерделәр, хәтирәләр яңарттылар.
Чараның икенче өлешен чәй өстәле артында дәвам иттек. Өлкәннәребезгә китапханәбездә эшләнгән эшләр, ирешелгән үрләр турында Ләйсән Ракиповна таныштырды. Озак еллар мәдәният бүлеген җитәкләгән Миннехат Гатович үзенең хис – кичерешләре белән уртаклашты, соклану, рәхмәт сүзләрен җиткерде. Һәр китапханәче үз эшчәнлеге турында, тормышы, эштә булган кызыклы вакыйгалар белән уртаклаштылар. Мәдәният бүлеге җитәкчесе Рөстәм Фидаилевич өлкәннәребезгә олы рәхмәтләрен җиткереп, алга таба да безгә өлге булырга язсын дигән теләкләр белән таралыштылар

Музейга килүче өлкән буын кешеләре өчен үткәрелә торган музей дәресләре төбәкнең тарихи-мәдәни мирасы белән кызыксынуга, аларны җәмгыятьнең мәдәни тормышына  үз өлешен кертүгә һәм үзара аралашу, аларга игътибар күрсәтү өчен шартлар тудыруга юнәлдерелгән. Шуңа бәйле рәвештә Саба урман хуҗалыгы тарихы музеенда өлкән буын вәкилләренең чираттагы җылы, җанлы очрашуы узды. Бу юлы музей дәресендә катнашучылар белән Лесхоз поселогында балалар бакчасының барлыкка килү тарихы турында фикер алышынды. Яңа балалар бакчасы ачылу белән бәйле кайбер вакыйгаларны искә төшерделәр. Дәрес ахырында алар өчен «Алтын балык» мастер-классы үткәрелде. Һәркем үз эшендә иҗади осталыкларын тормышка ашырырга тырышты.

25 февраль көнне Хөснулла һәм Аллаһияр Вәлиуллиннар исемендәге Саба балалар сәнгать мәктәбенең  "Яшьлек" хореография коллективы һәм шул коллективның "Мизгел" төркеме "На высоте" дип исемләнгән Бөтенроссия фестиваль-конкурсында катнаштылар. Уңышлы гына чыгыш ясап, алар 1 дәрәҗә лауреат исеменә лаек булдылар. "Яшьлек" хореография коллективына иң яхшы массакүләм бию өчен 10000 сумлык сертификат, коллектив җитәкчесе А.З. Мөбәрәкҗановага  Рәхмәт хаты тапшырылды.

Ватаныбыз тарихында бик күп истәлекле даталар бар, аеруча кыйммәтле даталарның берсе - 23 февраль. Бу көнне илебез Ватанны саклаучылар көнен тантаналы рәвештә билгеләп үтә - без туган җирне басып алучылардан, тыныч вакытта авыр һәм җаваплы хезмәт алып баручыларга хөрмәт һәм рәхмәт белдерәбез.

Әлеге бәйрәм алдыннан, 2023 елның 22 февралендә, «Х. һәм А. Вәлиуллин исемендәге Саба балалар сәнгать мәктәбенең» 2 нче катында «Үз Ватаным сагында» дип исемләнгән балалар рәсемнәре белән күргәзмә оештырылды.

Башта, чара алдыннан, укучылар белән Ватан турында һәм Ватанны саклаучылар турында әңгәмә үткәрелде. Укучылар 23 февраль көнне бәйрәмнең барлыкка килү тарихы белән таныштылар. Аннары рус солдатының нинди сыйфатларга ия булуы турында фикер алыштылар. Балалар үз рәсемнәрендә бу искиткеч бәйрәмнең барлык хис-кичерешләрен һәм күзаллауларын чагылдырдылар.

Барлык теләүчеләрне күргәзмәгә чакырабыз!

Маскировка челтәрләре хәрби техниканы һәм инженерлык корылмаларын маскировкалау, яшерү өчен киң кулланыла. Мондый челтәр солдатларның тормышын саклап калуда да зур ярдәм булып тора.

19 нчы февраль көнне Саба балалар сәнгать мәктәбенең  Шәмәрдән филиалы тынлы уен кораллары бүлеге укучылары челтәрләр үрүдә катнаштылар!

  23нче февраль - Ватанны саклаучылар көне. Бәйрәм көн уңаеннан «Ләйсән» балалар бакчасы тәрбияләнүчеләре өчен Саба урман хуҗалыгы тарихы музее хезмәткәрләре, иҗади остаханә формасында яклаучылар көненә  карата, бүләк ясау буенча мастер-класс үткәрделәр һәм бәйрәм тарихы турында сөйләделәр. Балалар үз куллары белән әзерләнгән бүләкнең иң үзенчәлекле һәм кадерле булганлыгын аңладылар. Балалар бу бүләкләрне Ватанны саклаучылар көнендә әтиләренә бирәчәкләр.

20 февраль көнне Саба район үзәк китапханәсе реконструкциядән соң заманлаштырылган яңа бинада үз эшен башлап җибәрде һәм тәүге кунакларын кабул итте. Татарстан Республикасы премьер –министрның беренче урынбасары Нигъматуллин Рөстәм Камил улы, РФ Дәүләт думасы депутаты И.Вольфсон, Саба муниципаль районы башлыгы Раис Нургали улы Миннеханов  китапханәнең эшчәнлеге, китапханә каршында эшләп килүче клуб берләшмәләре белән таныштылар.
Саба сәнгать мәктәбеннән килгән рәсем укытучысы Гүзәл Равил кызы “Алтын куллар” клуб берләшмәсенә рәсем ясау буенча мастер - класс күрсәтте. 
Районыбызның танылган язучылары Гөлсинә Галимуллина, Илмира Гимаева да  үзләренең иҗади уңышлары белән бүлештеләр.
Шәүкәт Биктимеровның  тууына 95 ел тулу  уңаеннан үткәрелгән “Гаилә белән әкият илендә” видеоконкурсында җиңү яулаган Симет авылыннан Гатауллиннар гаиләсе Х.Такташның “Тәүфыйклы песи” шигырен сәхнәләштерделәр.
Саба гимназиясенең 4 А сыйныф укучыларына Халыкара туган тел көне уңаеннан “Туган телем – татар  теле” дип исемләнгән әдәби сәгать үткәрелде.
“Өлкәннәр” клуб берләшмәсе өчен патриотик чара әзерләнгән иде.Әлеге чарада Хайриев Илнур Зөфәр улы да катнашты, тарихи истәлекләр искә төшерелде.
Китапханәбездә яшьләр өчен уңайлы мәйданчыклар барлыкка килде. Аудио китап, колакчыннар, планшетлар ярдәмендә үзләре кызыксынган китапны укый, тыңлый алалар.Бүген яшьләр шуны сынап карады.
Китапханә яңа мөмкинлекләргә бай. Шушы мөмкинлекләрне тудырган Район җитәкчесе Рәис Миннихановка, мәдәният бүлеге начальнигы Рөстәм Фидаилевичка чиксез рәхмәтләребезне белдерәбез.