"ОНИКС" мәгариф үзәгендә әтиләребез һәм бабайларыбыз "Форт Боярд"ны яуладылар!
Ватанны саклаучылар көне алдыннан "ОНИКС" мәгариф үзәгендә чын бәйрәм һәм спорт рухы хөкем сөрде! 5-11 сыйныф укучыларының кадерле әтиләре һәм бабайлары өчен "Форт Боярд" исемле кызыклы квест-уен оештырылды!
Бу уенда безнең ир-атларыбызда ил сакчыларына тиң булган җитезлек һәм зирәклек сыналды. Катнашучылар бик теләп катлаулы биремнәрне үтәделәр, команда рухын, ихтыяр көчен күрсәттеләр. Квестның һәр этабы максималь тырышлыкны, бер-береңне яклауны һәм, әлбәттә, күтәренке кәефне таләп итте!
Көч, җитезлек һәм гадәти булмаган мәсьәләләрне чишү сәләте буенча ярышып, командалар киртәләрне җиңделәр, башваткычларны чиштеләр һәм серле ачкычларны яуладылар. Хисләр ташып торды, ә тамашачылар – укучылар һәм педагоглар – үз геройлары өчен көч биреп утырдылар!
"ОНИКС" мәгариф үзәгендә "Форт Боярд"ның төп җиңүчеләре 11 нче сыйныф командасы булды! Егетләрне һәм аларның батыр әти-бабайларын лаеклы җиңүләре белән котлыйбыз!
Мондый чаралар гаилә бәйләнешләрен ныгытып кына калмый, ә балаларда өлкән буынга хөрмәт, әтиләре һәм бабалары белән горурлану хисе тәрбияли һәм "ил сакчысы" сүзенең чын мәгънәсен ачып бирә.